المراية اتشوهت
لـــمـا الــمراية اتشوهت
الصورة طالعة مشخبطة
————————-
وشوش ضحـوكة قـــانعة
ووشوش كئيبة ملخبطة
————————-
وعيون هدفها الشــعللة
وفى الكراسى معبْــــطة
————————-
فيه ناس بتنفخ فى النفير
غاوياهـا زيطـــة وهــلـفطة
————————–
وع الشاشات ليلاتى ناس
هاتك يا رغـــى وسفسطة
—————————
ومن بعــــيد شــايف ديابة
واقــــفة غـــاوية الشـعبطة
—————————
لفيت مرايتى ناحية تانـية
شوفت هـوجة وفــطـفــطة
—————————
شوفت موجة جـــوة موجة
وشوش كتير متــمـرمــطـة
—————————
شقوق غويطة جوة حيطة
ف ليل شتا من غير غــطا
—————————-
اسـف مـرايتـى هــكرهــك
وهجيب مــراية مزقــطـطـة
—————————-
قــالت مــرايتى مســتحيل
الاخــد عــلى كــد الــعــطا