أنا يعجبني الرجل الاصيل الشهم عالي الشان , I dislike the man inherent Gallant high regard

أنا يعجبني الرجل الاصيل الشهم عالي الشان
عزيز النفس كسب الطيب عاده ما يخليهـا

واحب اللي بوقت اللازمه يصهل صهيل حصان
وتعجبنـي ريــاجيـل بعيــدات هقاويهـا

واحب اللي ليا منه علا في جوه الدخان
يوردها حياض الموت روحه ما يداريهـا

إلا منه قعد سلطان والا منه ركب شيطان
قوي الباس عرب الساس خيله ما يعفيهـا

واحب اللي ستر وجهه شراه بغالي الاثمان
الا من باعو الشيمه بغالي الروح يشريهـا

واحب اللي يخاف الله يجيك من العقل رويان
يشيـر بخير واهـل الخير للخيره يدليهـا

واحب الشهم ممدوح السجايا صافي الوجدان
الا من جوه ضيفانه على نفسه يبديهـا

واعز اللي يهلي بالضيوف ويشعل النيران
وآبي قولة هلا من قلب والعشيات ما ابيهـا

ابي الدله وابي الفنجال ابي الترحيب بالضيفان
ابي جلسة نشامى راعي المجلس يقهويهـا

ابي لي سالفة عدله معاها من الشعر قيفان
تشدك حكمة الاجداد يشدك صوت راويهـا

ابي النخوه وابي الفزعه واحب مجالس الشجعان
هل العادات والفزعات نعم لا حل طاريهـا

هل الشيمه هل القيمه هل المعروف والاحسان
هل التقدير والتأثير واللي بيض اياديهـا

واحب اللي ليا جوه النشامى يفتح البيبان
كريم من قديم الوقت ليا صكت لياليهـا

احب المرجله واصحابها واقدر الفرسان
بخيصٍ في معانيها قبل لبحث خوافيهـا

واعرف اللي يخوض المعركه لا صار بالميدان
يمشيهـا علـى رايـه وياخـذها ويعطيهـا

واحب اللي سوالفهم ذهب موزون بالميزان
مهو خبلٍ يخم السالفه بعدين يخطيهـا

واحب اللي رفع نفسه وجنبه مجلس الحقران
حشيم ما لقى حشمه تركها ما يدانيهـا

عرف نفسه لزم حده ولا هاين ولا ينهان
الى من زادت اللجه يجنب عن بلاويهـا

واحب من الرجال اللي يسمى شمعة الديوان
الا منـه تحـدث كــل كلماتـه ينقيهـا

ولا احـب اللئيم اللـي تصيد زلةٍ بلسان
الى منه سمـع زلـة رفيقه مـا يغطيهـا

واحب اللي ليا سوى غلط قال العفو غلطان
حلاة الرجل لا منه جرح روحن يداويهـا

ترى اللي يشد في رايه على طول المدى خسران
يضيـع ولا يطيـع ولا بغـاهـا مـا يلاقيهـا