عــــــــــــــذاب الــــــــذكــريـــــــــات
عــــــــــــــذاب الــــــــذ كــريـــــــــات
من يقول الحب مات ْ!
ياعذابي ..
ياعذاب الذكرياتْ
صوتك اقرب لي
من انفاسي ..
واحساسي ..
وجرحك في حنايا القلب
ينبض بالحياة
كل شي فيني
يذكرني بشي منك
واسمك في فمي
مازال
دافي عذب
مثل الاغنيات
ياعذابي
وياعذاب الذكرياتْ
وجهك اللي مر
ليلة قدر
في عمري
رجع بدري
من الماضي
على انقاض انقاضي
يلاحقني مثل ظلي
يبيني احترق كلي
بطاري الهم والآهاتْ
وانتي ثَم
يمي غارقه في اليم
وعيونك تناظرني بسكاتْ
بأسود من الليل حالك
سد في وجهي المسالك
وين اهرب من خيالك !
صورتك !
عطرك !
سواليفك !
جدايل شعرك المنثور
في كل الجهاتْ
وين ياأحلى البنات !
طيفك الواقف ببابي
لانوى المسرى ..
سرى بي
بات يقرا في كتابي
ماتيسر من عذابي
من أنيني
من حنيني
من سنيني
الضايعه مني
على درب الشتاتْ
ياعذابي
ياعذاب الذكرياتْ
حبك استنزف شعوري
واقتلعني من جذوري
وأسأل الله الثباتْ