قالت قصيمي قلت فخر ومعزة
قالت قصيمي قلت فخر ومعزة ****** أهل الكرم والعلم والحلم والباس
قالت قصيمي قصدها بي تهزة ****** ماتدري اني بفتخر وارفع الراس
الحمدلله روسنا دوم رزة ****** اللي خلقنا بس نحني له الراس
صافي نسبنا والحسب فية عزة ****** أصل أصيل وفصل والعرق دساس
أهل الوفاء والدين صافي منزه ****** عن كل ماشاب العقيده من أدلاس
حنا العقيلات انشدي رجال غزه ****** حنا هل الدنيا وللدين حراس
حنا سنايد نجد في كل حزه ****** لا خانت حلوق الرجاجيل الأنفاس
حنا اجبال يعجز الريح هزه ****** حنا لنجد حزام وعصابة الراس
نارد حياض المرجلات ونلزه ****** مانمشي دروب الرذيله والأدناس
من يغلط لسانه علينا نجزه ****** واللي يحقر قدر الرجاجيل ينداس
منا العدو تكفيه بالعين خزه ****** يقضي عليه الخوف مع كل هوجاس
من ذكرنا في قلبه تثور نزه****** من طاري القصمان يبلاه وسواس
نومه كوابيس وروعه وفزه ****** دقت نواقيس الخطر له والأجراس
وان هو لقي له من علينا يوزه ****** هون له الصعبات وابليس خناس
مايدري انه للمهالك يدزه ****** عجل علي مبناه يمحي من الساس
يابنت حنا من نخانا نعزه ****** يأمن بنا الملهوف وتهابنا الناس
مرسولنا للخير دايم نكزه ****** ولصرخة المحتاج نرخي الأكياس
تاريخنا مجد لبسناه بزه ****** نمشي بوسط السوق ماندحم الساس
لك ماتركنا بكاس الأمجاد مزه ****** واجد عليك ومثلك حثالة الكاس
وش جاب حر الطير لفريخ وزه ****** منهو يساوي جوهر الماس بنحاس
لاتحسبين انك لنا مستفزه****** وش ياخذ الباعوض من ريش قرناس
*·~-.¸¸,.-~* إهداء خاص لكل القصمان *·~-.¸¸,.-~*
تحيااتي