ذكرى الطفولة

ذاك الدهر الأولي راح
…….والله ما ظنيته يروح
وقتٍ قضيته بلهو ومْزاح
…….وطرٍ خلا م الهم والنوح
ذكرى الطفوله هيلها فاح
…….بين الأعوام المقفره تلوح
محلاه ذاك اللعب يا صاح
…….بين الظلال وْوارف الدوح
ما نشتكي من هم واتراح
…….نقضي وقتنا بلعب ومْزوح
أيام مرّت كلها افراح
…….والأمن فيها شيّد صْروح
تشهد لنا هاذيك لبطاح
…….وتفخر بنا باحات و سيوح
ويلي عليها أيام الاشراح
…….إنس وْ شراغه وجوّ مفتوح
راحت وماضي وقتنا انزاح
…….وبْذكرها أيامنا تبوح
تشرح لجيل اليوم بالواح
…….وسط الكتب كل شي مشروح
ولّى الزمن الأولي و راح
…….ووالله ما ظنيته يروح