لوعة الفراق

لــــــوعـة الفراق

تحرك ياقلم واكتب ومن دمعي خذ الاحبار
… ولون حبرك بدم نبع من قلبي المكسور

وسجل ياقلم يوم كوى قلبي بلهيب النار
… بيوم اسود حالك كئيب ومظلم الديجور

وانا ياما كتبت ابيات وانا ياما نظمت اشعار
… وهاي المره الاولى وانا اكتبها بدون شعور .

رحلتي وياشقا روحي رحلتي ياضيا هالدار
… رحلتي وانطفا بعدج فرحنا وافتقدنا النور
.
وسالت عبرتي مره وهلت دمعتي مدرار
… وأظلم بيتنا العامر واصبح صامت مهجور

وسلمت الامر للخالق اللى قدر الاعمار
… اله العرش سبحانه بأمره راضي ومسرور

فراقج صعب ياأمي ولا له وصف ومقدار
… مثل غصن تزين بالزهور وحد قطف لزهور

يزيد الشوق ياامي كشوق الارض للامطار
… ولو مرت سنين العمر ولو طافت علي دهور .

يصبرني على حزني جزا الرحمن للابرار
… وبدعي الحين ياخواني ومن أمن معي مأجور .

عساها بجنة الفردوس بصحبة صالحين ابرار
… وعساها في رضى الخالق وعسى انه ذنبها مغفور
.
وعساها وكل موتانا وسط جنات وانهار
… يذوقو من عسل صافي وشراب من لذيذ خمور .

وعهد الله ياأمي تظلي في الحشا تذكار
… ولاانسى حنانج يوم الين أسكن معج لقبور .

وكيف أنساج ياأمي وحبج سر م الاسرار
… ودعه الخالق بقلبي وهو في مهجتي محفور .

وببقى مثل ماكنتي تناديني ياولدي البار
… وعسى ربي يقدرني أبرج بالدعاء المأثور .

ختمت القول يااخواني وصلو ع النبي المختار
… محمد خير خلق الله عدد ماغردت لطيور .