كردنه جدع.. قلب الهوبا .. وهلالنا رجع .. !!.. بقلم الرشيد علي عمر

السودان اليوم:
• انه صنيع صبرك يا كردنه ..
• عانيت .. وتعبت .. وانهكت .. شتموك .. وسبوك .. واهانوك .. ورابطت في محطات الصبر الجميل حتى نلت الثمار باحلى كتيبة من الاقمار ..
• الم اقل لكم ان كردنه جدع ..؟ وذاك هو سحر الهلال على يديه رجع .. افرح قاعدتنا وهناااااااااااك زاد الوجع ..
• اربعتنا .. بدون .. منشطات .. فلتخرس ألسنة اهل الاحقاد ..
• لا عندنا لاعب ببلبع …
• لا عندنا لاعب بدورلو مساعدات خفية …
• لا شفتو لاعب ارتمى على الارض وتلوى من فرط الالم ..
• ولم يجلس اخر على كنبه لانه مصاب بلوايه ..
• ولم يسافر مهاجم لدينا بلبع وكاس العلاج بالقاهرة..
• خدمة يمين .. وعرق جبين .. وانتصار بقامة شعار الملايين ..
• من يخرج ليحدثنا عن ضعف خصمنا فليحتفظ برايه لانه لن يعنينا في شىء فهو ينظر الى نصف الكوب ولا يرى ما حدث في الفرقة الهلالية من قفزة كبيرة اكدت ان كردنه صنع كتيبة القتال القادرة على مجابهة الابطال ..
• من حقنا ان نسعد بما تابعنا قياسا بفترة الاعداد القصيرة وضغط اتحاد الكرة وذاك العداء الممتد في كل خطوة ..
• الهلال في ظل هذه الظروف يحسم خصمه برباعية اذن هنالك عمل كبير يضيف الكثير لجهازه الفني واللاعبين ويمنح القائمين على امره الاحترافية المطلوبة في الاختيارات ..
• يخفق ويصيب حتى بلغ هذه المجموعة التي ترتدي الشعار وهذا يؤكد ما ظللت اكتبه عن النظرة الفنية التي يمتلكها الكاردينال ويفتقدها حتى الذين استعان بهم كلجان ..
• واكرر المعلومة .. ظل اشرف يمنح ملف التسجيلات لمختلف اللجان سواء قدامى لاعبين او ادريين او غيرهم ويتحمل اخفاقاتهم وتردي وسلبية اختياراتهم ولم يخرج علينا يوما ليلقي اللوم على احد بل يرد بمنتهى التهذيب انه يعمل وفقا لما يقرره اهل الشأن الفني ..
• لكنه في السنة الاخيرة اوصد الباب بالضبة والمفتاح وبات ينتقي من يراه مناسبا للشعار فتواصل مع وكلاء اللاعبين وتابع متالقي الداخل مع احتفاظه بمواهب الشباب والرديف حتى بلغنا معه هذه التوليفه التي رايتموها بالامس المدعومة بالجدد والخبرة والشباب فالهبت المدرجات واعادت سيرة الابداع ..
• انشغل الاعداء بخبر حظره عن السفر وانشغل هو باسعاد شعب الهلال فهل عرفتم الفرق وكيف يفكر الكاردينال ..؟
• ومازلت عند رايي ان مشاركة جمال سالم كانت اكثر من ضرورية ليدخل معنا اجواء التنافس ولينال الثقة التي اتت به من المريخ ..
• يونس ممتاز وثابت ومتميز ولكن من حق جمال ان يجد تقييمه كحارس يعتمد عليه وهذه للاسف فاتت على فطانة الزعفران ..
• ونرجو الا يتاثر جمال سالم ونراهن على احترافيته بانه سيتجاوز الامر بسهولة ولكن هنا دور لقطاع الكرة نحوه ونعشم ان يقوموا به حفاظا على معنويات النجم الكبير اوي اوي اوي ..
• جاء السمؤال يمينا واعتقد انه يعيش اسعد ايامه لانه وجد ارتكازا يساعده ويمنحه الفرصة لاخراج كل فنون موهبته ..
• ثم ان دنو صهيب منه امتعه لانه فتى ذهبي يعرف كيف يتناغم مع من هو بجانبه ..
• جاء فارس ايسرا … يا لفارس الفارس .. وما اروع فارس الفارس .. فارس في كل مكان على طول الخط … ابداع قتالي وحرفنه دقاااااقه ذكرتنا بتنقا اوووو تنقا ..
• فارس طالع نازل مراوغ وممرر وعاكس وصانع والله ابو عقال لو دخل في غيبوبه يكون معذور ..
• يا كردنه هم ينضموا بلسانهم وانت شغال قلع يحرق الفشفاش ..
• قف .. ايمانويل ده حرامي كورة عديييييل ولا قلب دفاع ولا حاجه ..
• دي ثقة ما شفناها قريبا في الملاعب ..
• بارد ولعاب وحريف وبلعب بدماغه ..
• ايمانويل نحب امتاعك ويا رب ديمه شادي الحيل..
• بوي ذاااتو التقول اتولد من جديد ..
• بوي الزمان كان بدفر وبعاين في الواطه .. هسي بقى يطلع بالكورة وصدره فاتح ويتاوق في كل الاتجاهات … هههه الولد فاكر نفسه باكنباور ..
• بوي يخطط ويرسم وينفذ .. يقبل شماله يدي فارس .. يقبل يمينه يدي ايمانويل .. يقبل قدام اما ديارا او الشغيل … وكمان جابت ليها ارسالية وفي كراع جيوفاني ليست مرة ولا اتنين … غايتو وريتنا حاجه يا بويا …
• وعشان يخلعنا شديد قام جاب القون الرابع براسية فدائية مية المية ..
• بوي عايز يقعد مع كردنه 25 سنة اكيد ..
• الارتكاز بقى روح الهلال ..
• والله كضاب البقول ديارا احسن من الشغيل او الشغيل احسن من ديارا بدليل ان الواحد بحتار يا ربي ده ياتو فيهم المرر او صنع او قلع ..؟
• ارتكازي متشابه في الاداء وباتقان يحسدا عليه ..
• كلللللله عرفناه كمان جابت ليها ثنائية ارتكازية يا زعفران ..؟
• المكوك ههههههه ياهو نزار اب قلبا حار ..
• نزار حامد من يومه لعاب وجامد ..
• عايز تتعامل معاه بقوة هو عنتر بن شداد .. عايز تعمل معاه حريف هو حمد دفع الله والرشيد المهدية والدحيش وكسلا الزمان ..
• اول مرة نشوف مجموعة سبعة لاعبين في لاعب وبسم الله ما شاء الله ربنا يخضر ضراعك يا نزار ..
• وصهيب جاااااااكم ..
• ود الثعلب مرق للصقيعه بالتابلوهات ..
• تعلوب من يومه مكار ولمن يقوم بولع النار في المدرجات ..
• تعلوب قررررررب ينضج .. ولمن ينضج النجاض كال الحساد ..
• جيو .. يا جيو .. واحب النقر سيد الكفر ..
• جيو بقى شكله غير وفي كل مباراة عنده قون زي القون ..
• يجيب القون ويصنع ويبدع ويمتع ..
• وما احلى سطح القدم عند جيو التي تصنع عكسية تخلع الما بتخلع ..
• الكشششششششششششششششششششه ..
• الكشه دور ومرق من نحسه وقال انا هنا …
• مبوبو ولع .. واشتعل .. واشتغل يا دووووووبو..
• بس هي وليعة نصاح ..؟ كرباج يدق في العراضه ويطير بره الاستاد قلنا كويس ..
• قذيفة من جوه خط تنمتاشر من عكسية متقنة للسمؤال من بعد تمريرات تبعد ببوصات عن المرمى .. قلنا كويسين ..
• التالته وااااقعه ..
• يلمها .. يلف بيها .. يعدلها .. يا لبرودك ياخي يعني لازم تختها لقدمك بالمقاس .. وتصويبة بعد ان حدد الزاوية ليعلن عن الهدف المرتقب والذي دشن به حضوره كاحد ابرع المهاجمين الذين ارتدوا شعار الهلال ..
• الكشه صنع هدف جيو وكما تقول الصناعة .. واحرز هدفا اقرب لطريقة نيمار الغدار .. وبت اللذينه لو طاوعته في الكرباج كان الحكم ذاتو وقف الكورة وقال يللا خلاص شطبنا ارجعوا بيوتكم انعل ابو البحكم كورة ذاتو تاني..
• ديارا هسسسس ما نسيتك ..
• ديارا خت هدف بتاع زول باله رايق ومرتاح وبلعب بلاى استيشن كتير ..
• ايوا ايوا اكيد بلعب بلاي استيشن كتير لانو ما ممكن يصوب كورة براسه والحارس يصنقر ..
• ههههههه عليكم الله تابعوا اللقطة الحارس صنقر وقمبر وقعد يعاين زيه وزي اي مشجع ..
• ياخي ده اتخلع لمن اتشل لمده ثانية ..
• انتهى الشوط وقلنا الزعفران حيجي الشوط التاني يفرتق الجيش فرتقة ما حصلت قبل كده ..
• بس ده ما حصل ..
• ليه ما عارفين ..؟
• مع انو اللياقه فل بتاعت فتحي بشير ..
• بس كمان بشه صغيره ورانا العجب ..
• وزي ما قال احمد غازي ده ما بشه الصغير ده سيدا الصغير ..
• بشه صغيره او سيدا صغيره ده ولد عجيب عجيب عجيب ..
• قف .. بعد ده كله انا ما مبسوط ..
• عارفين ليه ..؟
• لانو حرام حرام حرام يا زعفران ما نشوف كواي القلوب شيبوب ..
• بتلعب بالنار يا زعفران .. الا شيبوووووب .. ده ما بجيب ليك الهوا … دا يا عمك هبوووووو ب .. !
ابقوا معي .. !
و .. للشريان ختام .. !
• يوم عجيب من الصباح امشي صاج السمك في معرض الخرطوم القى ليك محمد عبد الماجد وطلال مدثر قاعدين ركن والبخور طاقي وخاتين قدامهم تشكيلة هلالية وهاك يا تنظير التقول كردنه والزعفران … الزعلني انهم تنباوا بالرباعية ..
• غايتو لو ما بعرفهم كنت قلت ده ود التاج بتاع الجماعه الولع المبخره وقطع فيها اسماء لعيبة اتحاد العاصمة ..
• سعادة التراس ولعت الجوهرة بالدخان وما جعل الحكم يوقف المباراة ..
• لابد ان تعرف كتيبة التراس ان الفعل يضر ولا يفيد وربما صدر قرار بان يلعب الهلال بدون جمهوره فهل هنالك عقوبة ستقع عليهم اعظم من منعهم الدخول والتفاعل مع الاسياد ..؟
• اثق في حكمتهم وان الفعل لن يتكرر لانهم الاحرص على الهلال ..
• كما لم يعجبن التواجد الجماهيري الذي لم يتناسب والمعركة الافريقية ..
• جاء وليد وحاول ولكن الزمن لم يسعفه ..
• شلش دخل في النهاية كتكتيك للزعفران ..
• بالطبع ابدعت قناة الهلال لولا قليلا من هفوات القطع وحبس الصوت ولكن عشرة كاميرات لقنت الملاعب كيف تنقل المباريات ..
• نادر منصور ديمه في الفهم منصور وحديث احترافي كان بمثابة محاضرة للاجيال بكيفية التحليل..
• خالد الزومة فنان فنان في كل مكان ..
• كردنه جدع.. وهلالنا رجع
• هلال دق كفر وعزف وتر لمن الدلقون قبل كورة الليلة اتوتر ..
• كورة البلبعه بنعرفها ..
• وشغل الاناطين بنعرفه ..
• و.. اتبخري .. !

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق