قصيده رثاء للشيخ زايد بن سلطان رحمه الله

كل القلوب الجامحات معسوفه
في الحب للي هزنا في وفاته
….
لو من يموت تموت عقبه صفوفه
كان العرب ماتوا بلحظة مماته
….
ياويل عين اللي تعود يشوفه
ويا ويل قلب وسط دمه غلاته
….
وويل اليمين الي تصافح كفوفه
متعوده تمسك قلمه وعصاته
….
ويلي على زايد وشامخ كتوفه
لي من ضحك يازين بسمة شفاته
….
يا صدع قلبي صدع من نزف جوفه
يوم أنفجر شريان قلبي بغلاته
….
النجم الاشهب يوم يعلن كسوفه
تبرق عوض عن غيبته ذكرياته
….
عضيت بطن ابهام كفي حسوفه
لو تنعطى سنين العمر قلت جاته
….
واستغفر الله ما نسابق حتوفه
هذا وجع وأعلن بكبدي مباته
….
ياما تبادلنا الكلام وظروفه
وياما قسم لي لقمته في حياته
….
وياما طرد قلبي بطرياه خوفه
وياكم وصاني وسرت بوصاته
….
يالله بك مزبان نادر وصوفه
ياذا العزيز بعزتك عز ذاته
….
يا ذا الجلال ازبن جلالك تشوفه
بعين الرضا واقبل عطاه وهباته
….
يا ذا الكريم بجنة الخلد روفه
يا مورث عياله مكارم صفاته
….
أكرم عزيز النفس نفسه عطوفه
أرفع مقامه يا عظيم بسماته
….
واحفظه يا حافظ وزين ظروفه
يا مثبت الطود العظيم بثباته
….
وتوفق انجاله بدرب تطوفه
وتعينهم على الصبر صبح ومساته

اسمع صدى صوته وتلفي طيوفه
ويدور في ذهني جزيل كلماته
….
كتبت من دمعي مداد لحروفه
وانهيتها والحال عايف مقاته
……………………………….

الوسوم
إغلاق
إغلاق