الللة يرحم كل شهيد2019

كان فى شهيد فاكرينه مات

واقف يتفرج علينا من سكات

يدخل علينا زى نور المشربيه

ويزيدله شوقتا من حديث الذكريات

يسمع دموع الأمهات

حمال أسيه

والصبر غيه

صوت المظاهره يلهمه

طالع لجنة ربنا على سلمه

والكام رصاصه الدفيانين جواه معدتش بتألمه

أيوه ماعدتش بتألمه

الأ اما واحد صاحبه يبكى عليه ويتشحتف بكلمة زى

* الله يرحمه *

——-

خلفتى يا مصر ومن خلف شهيد ما مات

سبع تلاف عام مواكب خير بتتوالى

خلفتى فرحه وفرحه غيرنا لسا ما جات

خلفتى كلمه لأمه لسا قواله

خلفتى راجل بيهزم جيش من الأوغات

نعلى بأفعلنا ونفوسنا ما تتعالى

بننحسب بالغلط فى لستة الأموات

وأحنا اللى ما عشنا فوق ظهر الوجود عاله

——-

كان ياما كان كان فى شهيد

كانت نهايته أو بدايته لما يوم حفروا القتال

خلف شهيد كانت حكايته لما يوم عبروا الطريق

خلف شهيد عاش كالراجل

حربه أسمها اللقمه الحلال

كان فى شهيد عايز سؤال

مين اللى ماسك دفة المركب وحادف ليه شمال ؟؟؟؟؟!!!!

مين اللى خرب مركبك يا مصر ???

مين اللى داس الكوخ برجل القهر ???

————

كان ياما كان كان فى شهيد رافع علامة النصر

يوم كان فى عباره ويوم كان فى القطر

وليله بايت فى الدويقه جوا بيت من سخر

وليله جوا القسم أو فى المعتقل راضى وسعيد

خالد سعيد عاش كالراجل بسيد بلال

——–

كان ياما كان كان فى شهيد

خلف شهيد جاور شهيد

كان جد جده كمان شهيد

صاحب شهيد ناسب شهيد

جوز بناته الخمسه لولاد الجيران

طلعوا ولاد عم الشهيد

جابم شهيد

عاشم وما عاشوا يقاوموا القتل فى الطوابير

ماشين على المسامير

والكل بيعظم سلام لعصابة الخنازير

والظلم فاض

هات طوبه ياض

داخلين علينا البلطجيه طوال عراض

راكبين جمال شبه القراض

هات طوبه ياض

حصلى دغرى عند عبد المنعم رياض

بتقولى عبد المنعم رياض !!!!!!!

مش قولتلك

كان فى شهيد خلف شهيد

طب ايه الجديد

ربك يريد

أنت الشهيد اللى جنبك ضى

واخد 3 رصاصات على شومه ماقولت الأى

زينة ولاد الحى

وانتاى الشهيده عروسه ملهاش زى

انت الشهيد وقصدتى ماشى فى موكبك بتزك

أنت اليقين لأمه عاشت عمرها بتشك

ماشى فى طريقك محترم والكل ماشى يعك

نزلتنا بأسلوبك أنت لزحمة الميدان من زحمة الفيس بوك

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق