الـــــمــــرجـــــلـــــهـ

&& الـــــمــــرجـــــلـــــهـ &&

إذا المراجل لبسة شماغ وعقال

قل للعذارى يلبسن العمايم

ماعاد يفرق زول حرمه ورجال

دام الفعايل تشبه البعض دايم

المرجله ماهيب كلمة وتنقال

وتروح ماراحت هبوب النسايم

ولا خشونة صوت او رفع الأثقال

أو رزة صدور وفعل الزلايم

ولاهي بعد مفتاح موتر وجوال

وإلا ردي لسانن حديثه شتايم

المرجله شيمه عن القيل والقال

رفيع نفسن حر بالجو حايم

المرجله عقل وزن وزنه جبال

ودون العقل وش فرقنا والبهايم

يا مسندي لو مايل الوقت بي مال

ياولد أبويه ياعظيم العزايم

يامعرب الجدين من العم والخال

يانخوة المفزوع وقت الهزايم

المرجله ياخوي هي طولة البال

هي العزم هي الصبر فالظلايم

فيها الكرم عزه دله وفنجال

فيها الكرامه عن ردي الطبع شايم

والدين لامنه خذا القلب منزال

مشى طريق الحق وابليس نايم

ومن لاعرف ربه في طيب الحال

لابد وقت الضيق بالهم هايم

حتى صلاتك مع جماعات ورجال

في خيرها ياخوي نعم الغنايم

ولامن رفع ربي له كل الاعمال

حسن الذكر لاقالو فلان صايم

وخلك شريف القصد ياطيب الفال

سوء المقاصد فالبيوت الهدايم

واحذر تبيع النفس في دب الأنذال

وتتبع خوي ابليس راع النمايم

النفس خيل لك اذا كنت خيال

ومن لاقوى نفسه قوته الهزايم

ولاصرت ماتدري لوش انت رجال

والله خسارة فيك ذبح التمايم

&&&&&&&&&&&&&&&

الوسوم
عزيزي الزائر اذا كان لديك اي سؤال او اي استفسار يمكنك مراسلتنا عبر رقم الواتساب 0993817568
إغلاق
إغلاق