الخميرة بتصحي الدقيق !!.. بقلم محمد الطيب الأمين

السودان اليوم:
في العادة الذي يقبل الوقوف بالساعات في صف( الرغيف )أوصف (الوقود) أو صف (القروش) هو إنسان صبور
الصفوف لا يقدر عليها إلا (أيوب)
وناس البيت في الغالب يركزون علي أكثر الأبناء صبرا حتي يتصدي لمهمة الصف وإنجازرغيف الفطور
وبما أن ذلك كذلك نري أن أي بيت سوداني فيهو وصيفابي يجب أن يتم إرساله ليقف في الصف
استغلو الوصيفاب الموجودين في البيوت واستغلو صبرهم (الفايت الحدود)
من يصبر علي الوصيف وهو يدمن الطيران من التمهيدي قطع شك سيصبر علي صف الرغيف حتي وإن كان (الرغيف لسه في طور العجين)
صبر الوصيفاب علي (مدفور البلد) يجب أن يتم توظيفه بالطريقة الصحيحة
هذا (صبر) مهدرساكت
صابرين ليهم علي فريق الخروج من التمهيدي عنده زي (واجب العزاء)
والله صحي
كل الفرق التي (طيرت) الوصيف طوال السنوات الماضية من التمهيدي هي فرق تاريخ تأسيسها لم يتجاوز العشر سنوات
فريق فايبر أصغرعمرا من النعسان
يعني النعسان لما خرج للدنيا الأخوة اليوغنديين ما فكروا في فايبر
فريق مغمور أبعد فريق طاعن في السن
فايبر حتي في يوغندا لايعرفه الناس
فريق بلا جمهور
مغمور ولاقي مدفور
أظرف حاجة اعلام الوصيف حمل الخروج لمجلس الإدارة
ده يعني علي أساس إنو أول مرة تطيروا من التمهيدي؟
فريق كل سنتين بيطير من التمهيدي لوكان قريش أو الوالي أوود الشيخ
الوصيف طار من التمهيدي حوالي سبع مرات في عهد جمال الوالي
يعني الطيران ما عندو علاقة بالرئيس منو
دي عادة كده
عادات وتقاليد
وكثير من العادات والتقاليد مضرة ومع ذلك نفعلها
لو جلس أوردوغان علي كرسي رئاسة الوصيف سطير المدفور من التمهيدي
القصة مافي الرئيس
القصة في الوصيف
دي قسمتكم كده
مكتوب ليكم كده
زي ما قسمتكم تأخدوا (سبعة)في الأردن بسبب البرد
برضو قسمتكم تطيروا من التمهيدي
وأنا والله طيران التمهيدي ده ما شايف إنو فيهو مشكلة
ولا يفترض الجمهور يزعل والإعلام يهاجم
الزول بيزعل في الحاجة الما عادية
العادي ما بيزعل
هسة عندكم أهلي شندي ده طار وهو ساكت
أكلوها في حنانهم وسكتو
أنابس داير الجديد شنو في إنو الوصيف يطير من التمهيدي
الجديد شنو يعني
نفس الطيران ونفس التمهيدي
مافي جديد
البشوفكم زعلانين يحلف يقول السنة الفاتت لعبتو في الفاينل الموسم الفات طيران من5 التمهيدي والموسم ده برضو طيران من التمهيدي يعني ما جديد
في المدرسة لو في طالب كل سنة بيجي الطيش هل بيزعل لما يجي الطيش تاني وأصلا هو5 طيش كل سنة ؟
أنا إفتكر إنو زعل الوصيفاب غير موفق
زعل في غير محله
وده كلو كوم والإتحاد الجزائري5 كوم تاني
تمشو الجزائر بنفسياتكم أقسم بالله سبعة ما تحلكم
عندي ليكم إقتراح
والإقتراح خاص بالجهاز الفني 5
في الجزائر ألعبوا بتنظيم (١-٩-١)
منجد النيل في المرمي وقدامو (٩) في الدفاع وقدامهم لاعب إرتكاز
ده أفضل تنظيم ممكن يلعب بيهو الوصيف في الجزائر
وأنا ما بقول كده عشان الوصيف ، وإنما منعا للفضيحة 4
الوصيف ح يندم إنو فاز علي الإتحاد الجزائري في مباراة الذهاب
ح يندموكم والله
أمشو إتشلاقوا وقولوا دايرين تجيبو قون في الجزائر
والله تعرفوا حاجة
مشاركين في البطولة من أجل المال والأخوة الجزائرييين ح يوروكم المال وسد المال
والسنة دي بالذات يامتنا من الضحك وياكمان الضحك كلتنا
المهم
نرجع ونقول وننصح اﻵباء واﻵمهات في البيوت بأن يركزوا علي الوصيفاب فيما يتعلف بصف الرغيف
ما ترسلوا الولد الهلالابي لأنو ما بصبر ليكم علي الصف
ركزوا علي الوصيفابي (جلدوا تخين)وشبعان طيران
الجزائر في إنتظار الشهيد الواحد بعد المليون
أوع في الجزائر تعملوا فيها فريق كبير وتحاولو علي مرمي الإتحاد
قفلوا ورا بس
وأنا شايف لو سافر معاكم الفاتح النقر لزوم الخندقة وكده يكون أفضل
أنا شايف كده
وأي زول طبعا حر في (شوفو)
وتبكو بس عين قطرة وعين مس
وغايتو الله يكفينا شر (المصدي) اللمتعو الأيام
وأنا ليهم بقول (ألعبو بتنظيم ١-٩-١)

إقراء أيضا  عودة نحو 350 لاجئ سوداني من معسكرات تشاد إلى غرب دارفور

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق