استعدي لرمضان :) رمضان مبارك 2019

التجهيزات:
*اعملي ركن للصلاة في الأوضة بتاعتك
افرشي سجادتك وعطريها وحطي السبحة والمصحف وكتيبات الأذكار

وحطي وردة مثلا..وخلي لبس الصلاة جاهز
كده ان شاء الله مش هتكسلي عن الصلاة

*يا ريت تستحمي مثلا وتلبسي هدوم نضيفة علشان تبقى منتعشة كده وجاهزة لرمضان

*جهزي أي مبلغ انتي عايزاه عشان الصدقة في رمضان (متنسيش ان الحسنات مضعفة في رمضان)

*اعرفي مواعيد البرامج المفيدة اللي هتتفرجي عليها ويا ريت بلاش مسلسلات عشان مش مفيدة وبتضيع الوقت
وبعدين طول السنة بيعيدوا المسلسلات
أنا ان شاء الله هتفرج على خواطر 11 للداعية أحمد الشقيري..
على فكرة..السنة دي هيبقى آخر موسم لبرنامج خواطر

اعملي خطة لرمضان
خطتك هتتضمن ايه؟
أولا الصلاة.. لو مثلا مش منتظمة في صلاتك, اعملي جدول لصلاتك وحاولي تنتظمي في صلاتك في رمضان
وان شاء الله هتتعودي ومش هتفوتي ولا صلاة بعد رمضان
وكمان حاولي تصلي السنن لأنها بتزود الأجر جدا
ممكن تصلي الضحى وقيام الليل كمان

ثانيا.. اعملي جدول لقيام الليل وصلي قيام الليل في البيت أو في المسجد صلي التراويح جماعة

ثالثا.. هتختمي القران كام مرة؟ اعملي جدول لختم القران..
لو انتي هتختمي القران في رمضان مرة واحدة، لاحظي ان رمضان 29 يوم.. يعني كل يوم جزء وهتختاري يوم تقرأي فيه جزئين

رابعا.. متنسيش ان كل صائم ليه دعوة مستجابة عند الافطار… فحاولي تعملي قائمة فيها الحاجات اللي هتدعي بيها كل يوم

خامسا.. اعملي أهداف في رمضان.. يعني لو عندك سلوك عايزة تصلحيه.. لو عايزة تخسي، رمضان فرصة… مثلا لو كنتي عصبية،
هتحاولي تقومي سلوكك.. مثلا لو مش بتسمعي كلام ماما حاولي تبريها وتسمعي كلامها… ممكن مثلا هدفك يكون العتق من النار،
فاجتهدي في العبادة والدعاء

سادسا.. اعملي قائمة للاعمال الصالحة اللي ممكن تزود من حسناتك.. زي الصدقة أو افطار صائم.. أو مساعدة ماما في تحضير الأكل

سابعا… اعملي خطة روتينية لكل يوم في رمضان هتعملي فيه ايه.. لو مثلا بتروحي المدرسة أو عندك شغل … هتكتبي يومك هيبقى ماشي ازاي
وحاولي تاخدي شاور كل يوم عشان ده هيخليكي منتعشة ومتحمسة لأداء العبادة
—
في رمضان.. حاولي تكتري من الذكر والدعاء
استغفري طول الوقت
وسبحي واذكري ربنا
قولي أذكار الصباح والمساء
وأذكار النوم
وأذكار بعد الصلاة
اشتري كتيب أذكار واقرأي منه

—
فكرة:
حاولي تحفظي 4 سور في رمضان
كل أسبوع احفظي سورة
—-
بعد رمضان… متوقفيش العبادة أبدا..
احنا مش بنعبد ربنا في رمضان بس…
رمضان ده مش شهر عبادة
ده شهر تغيير
يعني حتى بعد رمضان
خليكي منتطمة في صلاتك
وخصصي ورد للقران يومي