إيه هّي حياتك ! ايه هّي اهتماماتك 2019

اليوم قررت اكتب عن اكثر شي مهم بحياتنا احنا البنات
واكثر شي يميزينا ويخليلنا قيمتنا وسط الناس ،،

مو اللبس ،
ولا الشعر ،،
ولا البشره ،،،

[]شخصيتنا ، تفكيرنا ، وطريقه حياتنا …[/

مين منا ماقد قالت او حتى سمعت كلمه ” الحياه طفش” ، ” مليييييت ” ، ” ياشين الطفشششش”،
” الديره ملل” ، ” متى نسافر” ، ” ودي اسوي عمليه تجميل ” …… الخ من العبارات المحبطه للشخص وللي حوله
ولاتستغربون ممكن هالحكي يطلع بعد عزيمه ، او بعد سفره
المشكله مو بطول الوقت ،، المشكله بالفراغ داخلنا

اغلب البنات فاضيات ،،

تتخرج وجالسه بالبيت تنتظر العريس او الوظيفه !!

البعض الثاني لاتبي لاعريس ولا وظيفه تبي صديقاتها تبي فله تبي مطاعم تبي خرجات

وانتبهوا ! انا مو ضد هذا ابداً ،، حلوه الوناسه .. انا ضد ان هذا يكون كل حياتك

تنامين وتصحين وهذي حياتك وين بروح وين بجي !!

تنامين وتصحين وانتي مكتئبه !!

تنامين وتصحين وانتي من الفراغ تبين تغيرين شكلك !!
(حلو الاهتمام بالنفس، بس مو طول الوقت )

كثير بنات يتزوجون ويعتزلون الحياه ..
تصير حياتها زوجها وعيالها واهله واهلها ،،
طيب وانتي ؟؟ مالك حق على نفسك !!!
اعطي الناس حقهم واعطي نفسك حقها ..
لاتصيرين سلبيه ،، خلي لك دور بالحياه ..

كوني جزء من مؤسسه خيريه او تجاريه ..
سوي لك بزنس خاص .. اخلقي الفرص لنفسك لاتنتظرينها
كملي دراستك ، خذي ماجستير ، دكتوراه ، دورات في اللي ناقصك
اقري كتب كوني جزء من المجتمع
خلي لك دور بكل شي ،، سياسه – اجتماع – دين – الخ
خلي لك كيان و رأى ..

جربي يوم بدال ماتكتبين بقوقل ” خلطات تفتيح ” اكتبي ” المؤسسات النسائيه بالسعوديه “،،، هذا كمثال انتي دوري على اللي تحبين

مو عيب او غلط انك ماتعرفين وش تبين بالحياه كلنا كذا مانعرف وش يهمنا لين نبحث عنه
اقري عن كل شي لين ماتلاقين الشي اللي يشدك ..

في امريكا الطفل من عمر 6 سنوات وهو يقرأ بنفسه ويكتب رد على الكتاب يكتب وجهه نظره ،،
اسألي نفسك متى كتبتي رأيك عن شي !! حتى لو ما نشرتيه لو بس كتبتيه بدفتر وخليتيه ..

اختاريلك طريق بالحياه وامشي فيه ،، حطيلك هدف و ابذلي الاسباب للوصول اليه

مثال :-
2018 ببدأ ادرس انقليزي واجيب درجه التوفل
2018 بقدم على الجامعه للماجستير في تخصص التسويق
2018 بتخرج من الماجستير و بقدم على الشركه الفلانيه

الدورات اللي احتاجها :-
دوره تطوير الذات
دوره في التصوير
دوره في الرسم
دوره البرمجه العصبيه
الخ

هدفي في الحياه :-
اكون وزيره التجاره

هدفي اكون :ـ دكتوره بالجامعه واحارب لتغيير النظام بالجامعه
هدفي اكون
هدفي اكون

خلي سقفك السماء
اطمحي ولاتحلمي

لاتقللين من قدرك ولايقلل من قدرك الناس
فيه مثل امريكي يعجبني ، بالعاده يقولونه للشخص اللي احلامه متواضعه

shoot for the moon even if you miss you’ll land among the stars
نشن على القمر ، حتى لو ماقدرت تصيبه ! بتكون اقلها بين النجوم

العمر مره حاولي تتركين لك بصمه بالحياه ،،
شاركينا المجتمع ،،
وخلي لك دور فعال
..

يمكن كلامي مو مرتب ،،، بس الاكيد انه عفوي
حبيت يكون نقاش اكثر من انه وعظ ،،

ابي اسمع وجهات النظر واسعد جدا بالنقاش البناء

الوسوم
عزيزي الزائر اذا كان لديك اي سؤال او اي استفسار يمكنك مراسلتنا عبر رقم الواتساب 0993817568

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق