نعم الابن ……. الزوج 2019

دخل من الخدمة للدار ميت بالعيا ..قابلاتو يماه : (( شوف أنا مرتك ما وليتش نحملها نهار كامل و هي مقابلة المراية ما تخدمش كيما حنا ما طيبش كيما حنا ..دير كلش من راسها ))
(( خلاص يما لعزيزة ما تتقلقيش دوك نروح ليها و نفهمها))…طلع للشومبرا ….لقى مرتو مشنفة ..بدا يعيط و يسمع في يماه (( ما نحبش نزيد نسمع يما زعفانة على جالك فهمتي أنا يما هي كلش لازم تشاوريها في كلش فهمتي ))
العجوزة يماه راهي تسمع و ميتة بالفرحة….
ثم اقترب من مرتو و عنقها (( وشراهي عمري المشنفة ديالي لي زعفتها مامايا ….أسمعي ساعفيها شوية راكي تعرفي الكبار نتي شاوريها ما خسرتي والو و الله غير تحبك و شحال من مرة تقلي اتهلا فيها )) و بقى يفهم فيها و يدرلها العقل و ما خرجش حتى شاف ابتسامتها
راح ليماه قاتلو (( صحيت يا وليدي البنات تاع دوك لازملهم التزيار …ما ترخيلهاش الحبل تطلع فوق راسك ….اييييه الحمد لله اعطاني ربي ولد طايعني روح ربي ينورها في طريقك ))
(( شوفي يما انا صح عيطت عليها على جالك و فهمتها و بكيتها بصح هي راهي كيما بنتك نتي تحبي بنتك تكون ماشي مهنية ؟؟ شوفي هي قاتلي راني نحبها و نحترمها بصح نحب نوريلها شطارتي …و خليها يما دير واش تعرف راكي تعرفي البنات تاع دوك ماشي كيما نتوما بكري هوما يحبو المسلسلات ما ينوضوش بكري كيما ختي ..كيفكيف هه))…. و بقى يقنع فيها
غد من داك جاب 3 قرع ريحة خبى الثالثة و اخذ لمرتو 2. و قالها (( وحدة ليك و وحدة ليما و يما قاتلي هي تخير اللولة تدي لي عجبتها )) الزوجة ماتت بالفرحة و خيرت
جبد الثانية و اخذ ليماه 2 (( وحدة ليك و وحدة لكنتك بصح هي قاتلي يماك تخير اللولة هي احق مني )) القرعة لخرا طبعا لاختو ههه يماه ماتت بالسعادة و حن قلبها على عروستها و بدات المفاهمة

مقالات ذات صلة

زر الذهاب إلى الأعلى