ملّ الصبر من كثر صبر ٍ صبرتـه

ملّ الصبر من كثر صبر ٍ صبرتـه ] !

حيل الله اقوى مابقى في يدي شـيّ ..
مافيه حل ٍ فـي يـدي .. ماذخرتـه ..

حاولت .. لكن المحاصيل هيّ هـيّ ..
الطير طـار ولا بقـى الا شجرتـه ..

وقفّت اشوف شويّ واغمّض شـويّ ..
واللي انكسر في خاطري ماجبرتـه ..

لين الحقت شمسي على بارد الفـيّ ..
وشفت ان كل اللي جمعته خسرتـه ..

من كثر ماعزيت ريقي عـن المـيّ ..
ملّ الصبر من كثر صبر ٍ صبرتـه ..

كم هقوة ٍ ضاعت على سكة الغـيّ ..
وكم حلم ف( تراب ) الحقيقه قبرته ..

واقف .. وطعنات الزمن كلها فـيّ ..
وساقي لو انه كلّ منـي / كسرتـه ..

بعد ماعاش اليأس في احساسي الحيّ ..
اخوي .. لو هو صد عنـي عذرتـه ..

مدري عن اللي كنت احسبه بقى ليّ ..
اللي حزمت ابه الضلـوع وذكرتـه ..

اللي طوى حالي بحكم الهوى طـيّ ..
قصّر .. وانا كل الطريق اختصرته ..

ماهو خطا لاقلت ( تآمر على شيّ ) ..
الا الخطا .. لا اشتقت له وانتظرته ..