علمتهم…….للشاعر خالد الغامدي

علمتهم معنى يكونون اصحاب
وكيف الخوي يفزع لضيقة خويه
ويوم احتجتهم صكوا على وجهي الباب
اقفوا وكلاً يقول لصاحبه ويش عليه
دنيا غريبه مابها شك وحجاب
تبكي معاك سنين وتضحك شويه
لا وافقك وقتك ظنك معك خاب
ولا شفت عدل الناس شفت الخطيه
الناس بالدنيا غدوا مثل الاغراب
باطباعهم الغوا شروع التحيه
نظلم بعضنا دون ما نحسب حساب
ونعيب خلق الله والعيب فيه
فلان يتشمت على فلان ويغتاب
وفلان يحكي في شرف هالصبيه
وعنتر زمانه بالحكي صار كذاب
يحكي عن اوهامه بروحه وجيه
واهل السخافه مجدهم تو ماطاب
شفهم بخط الشات في الفضائيه
باموالهم ضاعت موازين وارقاب
وضاع العمر في حب ريما وسميه
ومازاد بلة طينهم غير الاجناب
قالوا نغير في طروق البليه
حتى غدوا شطرنج في ساحة العاب
ورزق المهبل من اوادم غبيه
والله مايحرق ماتبقى من اعصاب
لاشفت زول الرجل كنه بنيه
من ملبسه ماتفرقه غير الاشناب
ومن مشيته تكره حياتك مو ليه
سابق ينادونه زكي بهيئة الشاب
والان ينادونه ياجماعه زكيه
اضحك ورب البيت من بعض الشباب
وماقول غير الحمد لله عليه
اللي رزقني العقل من دون مارتاب
سبحانه المولى اله البريه
والختم صلوا على النبي عد ماغاب
ماغاب نجم وماطلع من عشيه

مقالات ذات صلة

زر الذهاب إلى الأعلى