شتاوي على العزيز و الكبد 2019

مازالت كبدي مفروعة …. مابين اللومة واللوعة

من مدة كبدي منفرعة …. عدا كل عزيز بقرعة

الخاطر كرب بين أثنين …. إنظر كيف انديروا ياعين

كل عزيز خذا ماسدا …. من كبدي ياعين وعدا

كملتي يا كبدي تقسيم …. إمغير الحيل خذاه قديم

كبدي من مدة مقسومة …. لكن تمسك في اللومة

كبدي مرهون إمقسمها …. ولي بين أيديه ظلمها

يانا لي كبدي منفرعة …. راحت مني قرعة قرعة

كبدي ذابت يا غيابي …. ماعد جيتوا شور إحسابي

كملتي ياكبدي تنهيش …. لي مو واخذ قال إمنيش

كبدي ياالغوالي ذابت …. منكم والقسمية غابت

كملتي ياكبدي تشريك …. لي ماجاتك تو أتجيك

كملتي ياكبدي تشريح …. علي كانون إمقابل ريح

كبدي مرهون أمقلويها …. كل نهار أيلذع فيها

قاسي يا مرهون عليها …. بين إيديك تقلب فيها

أيقلب في كبدي تقليب …. قديم وحظي فيه عطيب

كانون المرهون تقاوة …. والكبد تقول علي طاوة

قولو عالكبد الله دايم …. راحت بين ايدين قسايم

هك وهك قديم قلبها …. كبدي عالنار وسيبها

كبدي ماطيبها والي …. قسمت بين أيدين غوالي

إرطبهن يامرهون أيديك …. كمل جوفي منك تشريك

أتشرك ياغالي وأتزيد …. بعد الكبيدة ويش أتريد

علي كبدي من غير خصيم …. خذيت الغاية يالقديم

لي هاذا ينتش بيديه …. الكبد إتقول إتعز عليه

عليها داشع يالقديم …. الكبد ومسع جاك خصيم

الكبد أنقسمت بين ثلاث …. أتقول إلا قسمة وراث

ياناتش كبدي خليها …. فيه عرب قرعتهم فيها

كملتي ياكبدي تشريك …. لي له قرعة تو أيجيك

ثلاث قسمنا يامرهون …. أمعاك ولي وللواشون

يا كبدي ذبتي بليلك …. ماعد عندي وين أنشيلك

أخذوها مانبي لاشي …. لي ماوخذت تو إتجي

كبدي يالولاف أخذوها …. وين أتحطوها حطوها

حزت يا عين السهرايا …. كبد وشالوها الغنايا

لي ماعندا شي واشون …. أيزكي كبدة عالمرهون

عليكم يالولاف أشوي …. خذيتوا كبدي ولي لي

قسمتوها قسمة وراث …. أتقول إلا جرة محراث

أمغير تعالو يالقدم …. جميع الي في الجوف ألكم

ذابت الكبد ارياف ! كل يوم فالناقص علي لولاف ! ياريت يندرو

انخاف يا عزيز عليك …. اندير كبد تلوى ايدى بها

على عزيز داير كبد … وهو على ما با ايديرها

افداك يا عزيز الكبد …. اللى بين نيرانك هفت

على عزيز عندى كبد …. حتى ونا انوارى ذايبه

انحايل امغير اوحلت …. على عزيز كبدى ذايبه

ذايبه يا بعيد عليك …. الكبد نين روحه تالفه

فى الكبد نازلين ابثقل …. اعزاز نين فى دمى جرو

بريافك كليت الكبد …. نلقانك يا بعيد ضريتنى

تكبيد وغلا و رياف …. على عزيز عقلى منتهى

مقسى اكبودهم ياعين …. اللى عليك ما بو ينشدو

الكبد ياعزيز عليك …. حنونه و رقيته على

حنونه ودارت كبد …. على عزيز ويش ايفضها

رمشة عين انريد انشوفه …. كبدى ع الغالى ملهوفه

كبدي من النار الها فوحة …. نين الطفاي اكره روحة

كبدي ع النيران شووها …. قدامي ذابت خلوها

بعدك ما اندير جديد …. يالى عليك كبدى ذايبه

عزيز قتلنى بنار الشوق …. ايقطع فى كبدى ويذوق

داير عليك اكبيده … و مازلت يا غالى غلاك انريده .. حتى و انت على بعيد

كل عزيز عطيته حقه …. حتى والكبد لها زقه

كل عزيز نصيبه واخذ …. من كبدي وأنا مستاخذ

كبدى م النيران عديمه …. وشور الغالى تطلب ديمه

نيران عزيز اللي جوها …. تكل في كبدي خلوها

كبدي ذابت لا تلمسا ….. فاهق شين عليها قسا

الكبد انقسمت بين اقند …. مراهين وفاضي واجدد

اتذوب الكبد وتبقى دم …. وما ننسى طاري لقدم

خلاص خطانى يا القديم …. ذابت كبدى تميت عديم

نار قدم من تحت السافي …. تاكل في كبدي واطرافي

وين عليه اكبيده درنا …. خان عزيز كسر خاطرنا

لوكان عزيز اتقولوله …. كبدي من ناره ميكولة

كبدي مرهون مقرضها …. ويش ايلايمها لبعضها

كبدة مرهونين غلانا …. ماعد تنفع يا مطرانا

كبدي يالاولاف عليك …. ذابت غير القسم اخطيك

الكبد الحرفه يالقدم …. اليوم تصغر في الكم

عزيز كلا كبدي بغلاه …. امرايف ع الميعاد امعاه

رمش العين اتريد اتشوفة …. وكبدي ع الغالي ملهوفة

الكبد امخليها القديم …. كنايس قاعة ومفاحيم

نمشي شوار ادياره سرقه …. ونعاود كبدى منحرقه

كبدي تاكل في عليهم …. ندفر سيتهم و انجيهم

طمع ما عندى في لولاف …. امغير كلى كبدى لرياف

ما داير فى كبدى غيبه …. طالق مرهون مناشيبه

الياس رشق فى كبدى عود…. ومرمدها فى نار خمود

كنك يا نار مع كبدى …. وين انريد انغفى تبدى

ياناتش كبدى خليها …. فيه عرب قرعتم فيها

مقالات ذات صلة

زر الذهاب إلى الأعلى