شتاوى على القديم 2019, شتاوي وغناوي علم ع القديم

اتصدق ديمه اتصدق فيهم …….عيني مازالت تبيهم

يالقديم عليش اترقع ……..درنا صوب جديد امسقع

كان اتريد كلام الزبده……… عقلي طايح فيك بكبده

يالقديم طعمتك عدت……….. وماعمرا اللي عدت ردت

قيسك ياعيني امظيليمه………. تخنق فيك العبره ديمه

اطلقها تبكي نين اتمل………….اما تسكت اما تنعل
بأذن الله جديدك شاطر ………..يمسح كل اجروح الخاطر

الياس علينا موش غريب……… تمه ايجينا كي النصيب

الياس امسلمني للياس ………..بعد هكي تمرميد خلاص

اقسامي مادارنشي خير……..قديم عطنه فيد الغير

موش امغير حسوفه نقه……. فيد الغير عزيز انحقه

كل جديد إيجد برزقه…………. مالقديم الا للعزقه