سفر البنت من غير محرم (((( قصة حقيقية )))

سفر البنت من غير محرم (((( قصة حقيقية )))

الســــــــلام عليكم
سفر البنت من غير محرم ( قصه حقيقيه )
الحين اغلب البنات صارو فري وعادي على قولتهم السفر لحالهم
اغلب البنات صار يتكلمون باسم التطور واذا احد نصحهم قالو ياااااااي متخلف ورجعي
صارو اغلب البنات يقولون حنا في عام 2005 وداخلين على عام 2006 يعني محنا في عام الفيل

للي فكرها كذا ما اقول الا الله يهديها واقري هذا الموضوع اللي صار في مدينة الدمام من كم يوم

—————————————————-
وصل بلاغ لدوريات الامنية عن وجود بنت في اسواق بنده حوالي الساعه 12 في الليل وكانت تسرق

تخيلو بنت وفي ها الوقت وتسرق

المهم

لما وصلت الدوريات وكان الضابط موجود معهم كان السكرتيه الموجودين في بنده اللي في مخطط 8 سابقا القادسية حاليا كانو قد مسكو البنت الين توصل الدوريات

ولما وصلت الدوريات دار التحقيق بين البنت والضابط وقبل ما اقولكم وش قالت البنت طبعا طلب الضابط منها انها ترجع اللي سرقته وارسل الضابط معلومات عنها للعمليات يمكن تكون هربانه من اهلها او في احد مبلغ عنها او اي شي واتضح في الاخير انها سليمه وما عليها اي شي لكن وش اللي صار بينها وبين الضابط

الضابط : وش اسمك
البنت : فلانه بنت فلان
الضابط : من وين جايه ؟
البنت : من الرياض
الضابط : جايه مع مين ؟
البنت : مع صديقاتي
الضابط : ووين صديقاتك هذولي ؟
البنت : للاسف جيت معهم لشرقيه وسافرو وخلوني هنا لحالي

المهم

طلب الضابط الهيئه وراحت معهم

لكن تخيلو بنت تجي مع صديقاتها من الرياض الى الشرقيه ولحالهم وفي الاخير يتركونها لحالها ويرجعون الرياض

لها الدرجة وصل حال اغلب بناتنا من الحرية

انا اقول للبنت اللي مسويه نفسها قوية وما همها شي

انتي صحيح بنت ناس وعندك واسطات وعندك ناس تدافع عنك
لكن سؤال من عندي
تخيلي وانتي مسافره لحالك ولا همك لانك قوية وجاك واحد او اثنين او ثلاثه المهم وتجمعو عليك وش راح تسوين ؟
بتصرخين ؟
انتي قدهم ؟
تقدرين عليهم ؟

اذا الله ما انقذك منهم صدقيني راح تحسين بمعنى وجود رجل معك .

والشرع والرسول صلى الله عليه وسلم ما كانو ينصحوننا ويخافون علينا من عبث
لا والله
انهم الكلمه الحق
وحنا او اغلب بناتنا ما يحسون لان عقولهم صغيره للاسف

اختي

انتبهي لنفسك واحرصي عليها واتركي عنك رفيقات السوء

واذا تبين التطور محد ماسكك لكن تمسكي في شرع ربك وسنة نبيك لانهم هم المنجين لك من كل شر

تبين تطالعين التلفزيون ؟
طالعيه محد مسكك الين تحولين لكن بحدود وبحذر
تبين تروحين السوق ؟
روحي ولفي كانك دورية لكن مش كل يوم على الفاضي والمليان
تبين تسافرين ؟
سافري كانك كولومبس لكن خلي معك محرم محرم محرم

الله يهدي بناتنا وشبابنا وجميع المسلمين النمر الأسود