جــوهرة نجـــد
اسهر ومسهرني هوى لين العـود **** طفلٍ حرم عيني لذيذ المنامـــا
شكيت منه الحمر والبيض والسود **** وشقرٍ على الخصر المعزل تواما
وعكشٍ تشرع بالحجاجين وورود **** محاجرا تفضح رهيف اللثامــا
وعنقٍ مرق عن لبة الترف ونهود **** وخصرٍ هضيمٍ كن فيه الهيامـا
وردايفٍ منها فضا الثوب مشدود **** ليا مشى تطوي السلب للحزاما
لا واه أنـــا مذبوح عمدٍ وجحود **** يذاك ما بيني وبينك مدامـا
وحياة من في رادتـه هبت النود **** انك جرحت اللي حنينه اريامـا
ما حق يالطف الحشـا حب وصدود **** وعلام تسكت ما ترد السلامـا
كانك تبي تبرير للحب وشهـود **** انظـر بعينك في دموع تهامـا
وحالٍ نحل من حبكم كنه العود **** ونفسٍ تصوم بغير نية اصيامـا
لا ياحبيبي ويش حدك على الكود **** ماانت بعمى وشلون عنى تعاما
ان كان منك العطف واللطف مفقـود **** ذبح المحب بغير ذنبٍ حراما
ياهاجري ماف اشرف الوصل منقود **** عدني كماعود الولي لليتاما
بزيــارة تطلق من الحزن ممهود **** في قلبي اللي لك بوسطه مقامـا
عليه تشهر سيف الألحـاظ مجرود **** وإليا تعطف لك علامك تسامــا
وش ذنبه إلا انه بالأتعاس موعـود **** في حبك اللي مـا قضاله مراما
وبيت القصيداللي من القلب مشيود **** حرام ما يزهاه غيرك وسامــا
وشعرالغزل تزهـاه ياباشة الخود **** يا فاضحٍ بالنور بدر التماما
لك الغلا ياجوهرة نجد يا نجود **** حوريةٍ من حبهــا ما يلامــا