….العبي وهزي الشعر فوق الكتوف….
….العبي وهزي الشعر فوق الكتوف….
قصيده رائعه تغنى بها فنان ربما لايعرفه الكثير وهو فتى القصيم .. اهديها اليكم
العبي وهزي الشعر فوق الكتوف
خلي الحاسد يموت من القهر
وارقصي بالسيف مع دق الدفوف
وارفعي يمناك والكف الحمر
وهزي القذله على صفق الكفوف
واطربي منهو على شانك حضر
يوم قمتي قامت العالم وقوف
كل من شافك تعجب وانبهر
والبني صفوا على شانك صفوف
القدر جابك ويا زين القدر
والعذارى يالمها حولك تطوف
بالسما قمرى وبالساحه قمر
بينهم ما فيه مثـلك يالهنوف
لو تقوم البيض وتقوم السمر
وبالملا مالك شبيه بالوصوف
تشبهين البدر في نصف الشهر
نظرتك رماح وعيونك سيوف
تذبح اللي ناوي فيك الغدر
لو نظرتي الشمس غطاها الكسوف
لو نظرتي الغيم ينزل لك مطر
لو نطقتي حرف نادتك الحروف
لو زعلتي دقت اجراس الخطر
احسد اخوانك وربعك والضيوف
واحسد الشيله وعباتك والشعر
احلف بربي وازيد من الحلوف
ان ماغيرك حبيبه بالعمر
ليتها يا بنت تسمح لي الظروف
كان اببعد بك عن عيون البشر