احسبها صح ….حتعيشها صح

السلام عليكم ورحمة الله وبركاته

ساعات كتير الواحد بيقع في ذنب معين..
فالشيطان يضحك عليه ويخلليه يكمل ذنوب ومعاصي

يعني أبسط مثال على كده واحد مثلا نظر لبنت نظرة محرمة..
وبعدين تذكر فصرف نظره واستغفر الله..

تلاقي الشيطان يقول له ما أنت خلاص بصيت واللي حصل حصل…جاي بقى عامل لي فيه التقي الورع وجاي تغض بصرك…بعد إيه يا حبيبي..

فممكن كتير تلاقيه خروجته من أولها باظت وبقى طول طريقه مش عارف يمسك عينيه..

بينما الصح أنه لو وقع في ذنب مرة …واستغفر الله وتاب خلصنا أنه ما يرجعش تاني للذنب..
لو أنت خدت وزر.. وقف نفسك! ما تكملش وتزود الطين بلة..

وما تخلليش الشيطان يضحك عليك وييأسك..

بالعكس احرقه..
اتبع السيئة الحسنة تمحها
إن الحسنات يذهبن السيئات

وإياك تقول هو ده بقى الحسنة اللي بأعمله جنب بلايين المعاصي والآثام ؟؟
لأ ما توزنهاش كده

أنت أصلا عندك السيئة واحدة والحسنة بعشرة..سبحان الله الكريم الودود الشكور..

اقرآ آية واحدة من القرآن الكريم..
اقرأ “قل هو الله أحد” 3 مرات تعدل القرآن كله
اقرأها 10 مرات يبنى لك قصر في الجنة..

قول الحمد لله..قول استغفر الله..

ألق السلام على واحد..

وما تستهينش أبدا بالحسنة دي..
الرسول صلى الله عليه وسلم يقول “لا تحقرن من المعروف شيئا ولو أن تلقى أخاك بوجه طليق”..

الشيخ يعقوب كان بيقول أن لا يستوي صاحب المائة تسبيحة وصاحب المائة وواحد تسبيحة

يمكن تكون الحسنة دي هي اللي تخللي كفة الحسنات عندك ترجح بإذن الله..

شد حيلك وما تيأسش..
واستعن دايما بالله..

وربنا يوفقنا وإياكم..

مقالات ذات صلة

زر الذهاب إلى الأعلى