اتعبوا فى تربية ولادكم .. هييجى وقت تحتاجوا .. يفكروكم باللى اتعلموه منكم 2019

فى طريقهم من اسكندرية للقاهرة ..
ماما .. هو احنا هنصيف مع بعض فين السنة دى؟
بيسأل وكأنه بيقنع نفسه انه مايصدقش اللى بيحصل ..
ردت مامته .. هو احنا هنصيف بس مش مع بعض
وكأن اخته بتقرا اللى فى دماغه .. كملت وراه
بابا .. عيد ميلاد سارة صاحبتى الشهر اللى جى
اكيد هتكون رجعت من السفر ..
اعمل حسابك هتودينى ..
رد عليها .. معلش يا حبيبتى ماما توديكى
بصوا لبعض وهم قاعدين فى العربية ورا
ومدوا ايديهم مسكو ايدين بعض ..
فهموا يعنى ايه هو يقول لها ..
ترجعى بالبنت على بيت باباكى
وهى تقول له .. خلى بالك من الولد
وعرفوا دلوقتى .. ليه شنطتين سفر بس مش اربعة ..
ومع كل دقيقة بتعدى ..
دمعة زيادة بتتحبس فى عينيهم
ومليون فكرة بتتولد .. ومليون ذكرى بتتخنق
وقرروا يعملوا اخر محاولة ..
بابا .. هو انت ازاى جواك كل الحب ده ؟
اتعدل الاب وهو سايق وبص فى المرايا لبنته ..
ازاى يعنى ايه .. مش فاهم؟
قالت له .. انا عندى 12 سنة ..
طول عمرى شايفاك بتشتغل ..
كل يوم تصحى الصبح بدرى
تروح الشغل .. وترجع اخر النهار ..
تفضل قاعد تذاكر لى انا وادم ..
لغاية ما ييجى معاد نومنا .. وتنام من تعبك
ولا تعرف تخرج .. حتى اصحابك ابتدوا يبعدوا عنك
بسبب انك علطول مشغول ببيتك
كل ده والأم بتسمع ..
وبتبص له من ورا النضارة الشمس
وكأنها بتتعرف عليه لأول مرة
وابتدت البنت تكمل ..
عارف يابابا ..
كنت بابقى مستغرباك قوى
وانا شايفاك بتدخل على النت ..
عشان تجيب وصفة اكل تعملهالنا
والغريب انك كنت بتعملها وتطلع حلوة قوى
هو انت ازاى بتعرف تعمل حاجات كتير قوى كدة
ابتدت الام تركز اكتر ..
والبنت تكمل ..
انت عارف يا بابا .. سارة صاحبتى
مش بتشوف باباها غير يوم الجمعة بس ..
لأ هاضحكك كمان .. بتشوفه وهو نايم
واول ما يصحى .. يلبس وياخدهم النادى
عشان يلعب هو مع اصحابه ..
دى كتير كانت بتقول لى .. يابختك ..
باباكى علطول معاكى
تصدق يابابا .. كل ما اسرح شعرى
افتكرك وانت بتقول لى .. انا بحب شعرك طويل
وبابقى ماشية وسط اصحابى ..
هم مستغربين من طوله
وانا من جوة طايرة من الفرح ..
اصل انا عندى اب مش عندهم زيّه ..
ابتدت مامتها تميل جسمها فى القاعدة
عشان تعرف تبص لجوزها ..
وشريط فيلم بيتعرض قدامها ..
ايه دا .. هو ازاى انا ماكنتش واخدة بالى من كل ده
ويكسر السكوت .. رد الاب على بنته
جوليا .. انتى بنتى وانا ماكانش ينفع اعمل غير كدة
ساعتها بصت البنت لأخوها ..
فهمها ..
ماما .. بقولك ايه؟
هو ايه اللى فى ايدك ده ؟
هههههه .. دى لسعة من الفرن يا ادم ليه بتسأل؟
اصلى بصراحة باستغرب عليكى ..
ايديكى كل شوية تتلسع م الفرن
طب ما تبطلى تعملى حاجات فى الفرن
قالت له .. مانت عارف ان بابا لازم ياكل اكل مشوى
عشان الدهون خطر على صحته
قال لها .. تقومى تعملى لنا كلنا اكل مشوى كل يوم
دا متعب ليكى ..
خصوصاً انك بتبقى مستعجلة
عشان بتبقى لسة راجعة من شغلك
عشان كدة بتتلسعى
ابتدا الاب يتعدل فى قعدته .. ويركز فى الكلمتين
وباقى الفيلم اللى كانت هى بتشوفه ..
ابتدا هو يكمله
قال لها الولد .. تصدقى الواد رامى صاحبى
مامته مش بتشتغل ..
بس علطول اكلهم ديلفرى
قال ايه .. عشان ضوافرها بتبوظ من شغل البيت
بص الاب على ايدين مراته ..
لقى ضوافرها مقصوصة كأنها فى المدرسة
وكل ده من شغل البيت
بس سيبك انتى يا ماما ..
الحفلة اللى انتى عملتيهالنا انا وجوليا الشهر اللى فات كانت تحفة
تصدقى حلو قوى ان انا وجوليا توأم ..
ردت مامتهم .. مانا ماكانش ينفع اعمل غير كدة
انتو اللى طلعت بيكو من الدنيا
سكتو كلهم .. بس عقولهم مابطلتش اسئلة ..
هى تسأل نفسها ..
هو ازاى كان بيعمل كل ده فى البيت .. وانا شايفاه عادى؟
وهو يسأل نفسه .. هى ازاى واخدة بالها من صحتى قوى كدة ..
وانا مافكرتش اقول لها حتى شكراً؟
ادم : هو ازاى انا هانام واصحى الصبح مالاقيش ماما وجوليا؟
جوليا : هو انا هاروح الكلية وارجع لوحدى ..
دانا كنت عاملة حسابى ادخل انا وادم نفس الكلية؟
وسؤال يجر سؤال .. وذكرى تجيب اللى وراها
ويقطع السكوت سؤال .. طريق المطار منين لو سمحت؟
وقدام بوابة الدخول .. شنطتين ينزلوا من العربية
وتنزل معاهم .. دموع من عينيه .. ماقدرش يحوشهم
عمل نفسه بيدعك فى عينه ..
لقى ايد بتمسك ايده ووبتمسح من عليها دموعه
ونبرة صوت بقاله سنين ماسمعهاش ..
او كان قاصد مايسمعهاش ..
خلى بالك من نفسك .. خد الدوا فى ميعاده ..
وماتخافش على جوليا فى عينيا
مد ايديه وشال النضارة الشمس من على وشها
وكأن دموعها غسلت وشها من تراب سنين كلها تعب
رجع يشوفها زى ماشافها من سنين ..
يوم ما قال لها مش هاقدر اكمل حياتى من غيرك
ساعتها لقى دموعه بتنزل من غير استئذان
قالت له .. طب ليه بس زعلان ..
مش ده قرارك ..
قال لها .. اصلى مش باعرف اشوى اكل فى الفرن …
ضحكت من ورا دموعها وهى بتترمى فى حضنه ..
وشوشته فى ودنه ..
ولو ان ايديا اتلسوعت بما فيه الكفاية
بس صحتك بالدنيا ..
فاقوا على صوت كلاكس العربية ..
بصوا لقوا ادم بيرجع الشنط .. وجوليا بتزعق فيهم
ياللا يا عم انت وهى ..
عايزين نرجع اسكندرية قبل الضلمة ..
ومع اول كيلو فى طريق الرجوع ..
كان ادم وجوليا فى سابع نومة ..
بعد ما عملوا اللى عليهم ..
مش كل انفصال ..
وراه شريك غلطان
ممكن تبقوا انتو الاتنين صح ..
بس انتو الاتنين مش شايفين بعض ..
ومش سامعين بعض ..
اتعبوا فى تربية ولادكم ..
هييجى وقت تحتاجوا ..
يفكروكم باللى اتعلموه منكم ..
ممكن تفتكروا ان اللى فوق دا كله تأليف ..
بس انا عارف ان الكلام ده حقيقى جدااا …