ابيات شعر وقصائد شعبيه جديدة
محتويات المقال
مديت لك ..
مَديت لك.. واخذت مني.. ولا اعطيت
وطلبتني في شي واخذيت كل شي
وسامحتك لأني في حبك تماديت
وامسيت لي واصبحت في الصبح مو لي
بلا سبب ما اخطيت.. وان كاني اخطيت
اخطيت يوم اهدي ضميري وهو حي
المشكلة قَفيت عن وافي الصيت
وسايرت ناس باعت لحومها نِي
غروك من قدح الفلاش وتناسيت
ان الفلاش يموت في حضرة الضي
حرب البعيد
أدمح خطا مساعد على شان مسعود
أسكت حيا ماهو بخوف ومهابة
والصبر له حكمة وله وقت وحدود
أصبر على العجه برجوى سحابة
ومن لايعشق المجد مايكسب الفود
هذاك خبلٍ و ساتراته ثيابه
حرب البعيد يوحد الصف ياحمود
بس البلا ياحمود حرب القرابة
الصدقان
ومن كثّر الصدقان لابد يغرَم
ترى كثرة الصدقان ساس الوزايم
صدقان للضحكة.. وصدقان للهم
وصدقان لا جاب الزمان الطمايم
إذا عرفت الراس والعين والفم
مالك ومال جنوبها والقوايم
أوزن كلامك قبل يظهر وتبلم
هرجك يوردك الضرم والضرايم
جعلني مثل النخل
يالله لا اله إلا انت ياوالي الأمر
انت قضّاي الحوايج ثم انت المستعان
جعلني مثل النخل ما اجيب إلا تمر
لجل مايزعل علي فلان ولا فلان
ادري ان الوقت حوّاج والدنيا ممر
والأصدقا ماتذخر الا لحاجات الزمان
أحدٍ لما نصيته .. ثماني عن عشر
واحدٍ لما نصيته غَدت عشري ثمان
أُف
أف .. ياكبر الاحلام اللي على بالي وشفي
وأخ.. ياراسي من التفكير في من لا يشونه
وأح .. ياحر انتظاري للقبول من المقفي
وآه .. ياحب عطيته ناس مايستاهلونه
مشبعة في كل حاجة
مشبعة في كل حاجة يابو سعود
ما غير خصرً ذابحته النحافة
جديلها من فوق الامتان مفرود
وعلى الردوف النابيات التحافه
خذت من الشيهانة عيونها السود
وخذت من الظبي الجفول التفافه
على سلك الحرير آعصابه
لا تجيبون العلوم اللي تثير آعصابي
وانا رجالً على سلك الحرير آعصابه
جعل من يلعب ع الحبلين عند اصحابي
ما يلاقي مرحبا واهلين عند اصحابه
وجهك الفتان
سقى الله موعدك يا زين ..
سقى الله موعد الاحباب
سحابٍ ماهمى من عين ..
ولا جادت به الاحزان
سحابٍ ماطرٍ هتان ..
سقى الله في العمر ليله..
ظهر في صفوها بدرين ..
قمرها .. ووجهك الفتان
يقص راس الملك
فوق الحراير وفوق ملجمات الحنوك
مسعى ميات السنين يحققه بضحوه
خلى السلاطين تحت ذباب سيفه بروك
عند الجمال رغوة والمحصنات انعوه
لا يلتفت للملوك ولا عيال الملوك
يقص راس الملك ويقول صب قهوه
لا تدعك القلب
لا تدعك القلب ترجي يظهر المارد
ويقول لبيك عبدك باح مكنونه
شاب العتب وانقطع ما بيننا الوارد
ولولا الندم ما غرس فـ ابهامه سنونه
والحزن سيف على ارقاب الفرح جارد
وكل بسمةٍ في ديون الصبر مرهونه
إن صادفك في طريقك بالي الشارد
قله يموت الهوى .. باعيش انا بدونه