أحمد فؤاد نجم – أرجع لنا
أحمد فؤاد نجم – أرجع لنا
سيادة المخلوع … ارجعلنا
مش انت واحد مننا ؟؟
و عمرك في بكره سرقتنا
…ولا خدت مليم مننا
ما تيجي طب ترجعلنا
تقعد بأهلك وسطنا
أهو مرة تاكل أكلنا
وتلبس يا خويا من لبسنا
وتعيش في حارة او في شارع زينا
قلت ايه ؟؟ يا حارق دمنا
سيادة المخلوع … ارجعلنا
وغداك يا سيدي عندي أنا
رز و بطاطس مسرطنة
لحمة ؟؟… مفيش من سنة
فاكهة ؟؟… تقطن انت و أنا
و الشاي .. بآخر عالقة م السكر اللي كان عندنا
اشرب و فوق وركز بقه .. علشان نكمل حكينا
سيادة الرئيس … ارجعلنا
مش سبت الحكم .. لأجلنا ؟؟ـ
ما تيجي تسمع حكمنا !!ـ
أفكرك ؟؟ ولا انت فاكر زينا
قطار اتحرق من كام سنة
وغازنا اللي طار من أرضنا … لعدونا
وعبارة مللي بيغرقوا ..!! غرقت في عرض البحر و راحوا أهلنا … و الجاني فلسع مننا
ومركبة بأحلى شبان … ييجوا من ايطاليا غرقانين .. والقرش ياكل لحمنا
والله كانوا زينا
ومن الممكن أحسن مننا
لهم منازل و ولاد و عيشة و حلم .. زي حلمنا
اتغربوا و اتبهدلوا .. لما الفساد طال كل احتياج في أرضنا
واللي ما مباراة .. قاعد في غربته .. والغريب بيذلنا
اقول كمان ؟؟ ولا كفاية … و اهو انت عارف عننا
أصبر هتسمع حكمنا
سيادة الرئيس … ارجعلنا
ولو انت واحد مننا
فعلا يهمك أمرنا
بينا عالنائب العام .. تفتنله على ولاد الحرام … مصوا بلدنا و دمنا
و افتن دي فتنة مش محرّم .. ده حقنا
دا لو انت واحد مننا
أصبر هتسمع حكمنا
سيادة الرئيس … ارجعلنا
اقعد معانا و زينا
هعرفك …..ـ
دي (أم خالد) أمنا
ودول أهل (سالي) أهلنا
و(عمر بن بنونة ) إبننا
فسر و احكي و قللهم .. و قللنا
واستسمح الروح اللي منورة في الجنة نحو ربنا
هتقول مكنش قصدنا ؟؟ـ
دول ماتوا غصب عننا ؟؟ـ
كداب و فاجر .. و اللي يصدقك زيك .. والكدب ريحته منتنة
تتشل إيد اللي ضرب ،، و اللي أمر ،، و عليكوا لعنة ربنا
أصبر هتسمع حكما
أيوه بقول ارجع لنا
ياللي سرقت حلمنا
وغربتنا و نهبتنا … و في جميع حتة أهنتنا
إحنا اللي سال دمنا
في الأربعين و اسكندرية و التحرير يشهدلنا
آدي القفص … أقف هنا
والشعب يقضي .. مش أنا
صدقني … هي بينة
من فوق سبع سماوات .. قالها ربنا
العين بالعين والسن بالسن … و هو دا بقه حكمنا … و مفيش غيره عندنا