ولي ونتن من سمعها مايناما
البارحه يوم الخلايق نياما= بيحت من كثر البكا كل مكنون
قمت اتوجد وانثر الما على ما = من موق عيني دمعها كان مخزون
ولي ونتن من سمعها مايناما= كني صويب بين الاضلاع مطعون
والا كما ونت كسير السلاما=خلوه ربعه للمعادين مديون
في ساعة قل الرجا والمحاما=فيما يطالع يومهم عنه يقفون
والا فونت راعبي الحماما=غاد ذكرها والقوانيص يرمون
تسمع لها بين الجرايد حطاما=من نوحها تدعي المواليف يبكون
والا خلوج سايبت للهياما=على حوار ضايع في ضحى الكون
والا حوار نشقوا له اشماما=وهي تطالع يوم جروه بعيون
يردون مثله والضوامي اصياما=ترزموا معها وقاموا يحنون
والا رضيع جرعوه الفطاما= امه غدت قبل اربعينه يتمون
عليك ياللي شربت كاس الحماما= صرف بتقدير من الله مأذون
جاه القضا من بعد شهر الصياما=صافي الجبين بثاني العيد مدفون
كسوه من عز الخرق ثوب خاما=وقاموا عليه من الترايب يهلون
راحوا بها حروت صلاة اليماما= عند الدفن قاموا لها الله يدعون
برضاه والجنه وحسن الختاما=وادموع عيني فوق خدي يهلون
حطوه في قبر عساه الهياما= في مهمه من عزب الاموات مسكون
ياحفرة يسقى ثراك الغماما= مزن من الرحمه عليها يصبون
جعل البختري والنفل والخزاما= ينبت على قبر هو فيه مدفون
مرحوم ياللي مامشى بالملاما=جيران بيته راح مامنه يشكون
وأوسع عذري وان هجرت المناما=ورافقت من عقب العقل كل مجنون
اخذت انا وياه سبعة اعواما=مامثلهن في كيفية مالها لون
والله كنه ياعرب صرف عاما=ياعونة الله صرف الايام وشلون
واكبر همومي من ابزور يتاما= وان شفتهم قدام وجهي يبكون
وان قلت لاتبكون قالوا علاما=نبكي ويبكي مثلنا كل محزون
قلت السبب تبكون قالوا يتاما=قلت اليتيم اياي وانتم تسجون
مع البزور وكل جرح يلاما=الاجروح بخاطري مايطيبون
جرحي عميق مثل كسر السلاما=الى مكنه الاطباء يعجزون
قمت اتشكا عند ربع حشاما=جوني على فرقا خليلي يعزون
قالوا تزوج وانس لامه بلاما=ترى العذارى عن بعضهن يسلون
قلت انها لي وقفت بلو لاما= ولو جمعتوا نصفهن مايسدون
ماظني تلقون مثله حراما=ايضا ولافيهن على السر مأمون
واخاف انا من غاديت الذماما=اللي على ضيم الدهر مايتاقون
او خبلة ماعقلها بالتماما=تضحك وهي تلدغ على الكبد بالهون
توذي عيالي بالنهر والكلاما= وانا تجرعنيمن المر بصحون
والله لولا هالصغار اليتامى =واخاف عليهم من السكه يضيعون
لاقول كل البيض عقبه حراما=واصبر كما يصبر على الحبس مسجون
عليه مني كل يوم سلاما=عدة حجيج البيت واللي يطوفون
وصلوا على سيد جميع الاناما=على النبي ياللي حضرتوا تعزون