نصيحة لكل البنات : ادخلي شوفي الشباب واللي بيعملوه في البنات 2019

سلام عليكم يابنات

انا هاحكي موقف شفته امبارح

يابنات ياللي تحت العشرين وكمان ياللي ياللي فوق العشرين تعالوا شوفوا واسمعموا وشوفوا الشباب بيعملوا ايه

امبارح بعد مارجعت من الشغل ودخلت اوضتي انام شوية حسيت ان الجو حر قلت افتح الشباك حبة يدخل شوية هوي احنا شقتنا في الدور الثالث يعني قريبة جدا من الشارع وفي مكان هادي يعني اقدر اسمع كل حاجة في الشارع

المهم مش عايزة اطول عليكم انا لسة يدوب بفتح الشباك ولقيت 4 شباب واقفين تحت الشباك واحد منهم ماسك تليفون والله انا ماكنت ناوية اسمع حاجة بس انا حسيت ان شكلهم مريب وقلت اشوف بيعملوا ايه بحيث لو فيه حاجة غلط انده لاخويا رحت واربت الشباك وبصيت من وراه لحد مااعرف هما واقفين كده ليه
المهم اللي ماسك التليفون كان اكيد بيطلب رقم اول ما الرقم فتح لقيته راح فاتح المايك وقرب من اصحابه الثلاثة وقعد يسمعهم المكالمة انا طبعا الحقيقة مقدرتش اسمع المايك بس كان واضح جدا طبعا انها بنت

المهم كان بيسمع اصحابه كلامها وهما يضحكوا ويكتموا الضحك عشان هيا ماتحسش ان فيه حد معاه
بصيت لقيته قفل المايك وكمل المكالمة بس كل شوية حد من اصحابه ياخد الموبايل يسمع كلامها وبعدين يرجعلوا الموبايل ويقولوا هيا كانت بتقول ايه

سمعتوا بيقولها انا عايز اشوفك انتي وحشتيني ويروح يدي الموبايل لحد من اصحابه
وفضلوا كده لمدة ساعة تقريبا
وانا واقفة متغاظه ومحروق دمي منهم والله البنت صعبت عليا جدا مع انه هيا غلطانه بردوا والله العظيم دمي فاير لحد دلوقت
شكلهم كان حقير جدا ربنا يسترها علي البنت دي وعلي كل البنات