من شب على شئ شاب عليه 2019

يعني ايه “من شب على شئ شاب عليه”
يعني اللي بيتعود على حاجة من صغره بتفضل معاه لحد ما يكبر
يعني يا زوزتي احنا لسة زهرات صغيرين لسة حياتنا بسيطة جميلة لسة مكبرناش و المفروض السن ده ميبقاش كله لعب و هزار وضحك لا لا مش معنى اننا لسة صغيرين نبقى نقضي حياتنا بالطول و العرض منعملش حاجة مفيدة فيها
لا لا سننا ده سن التعود يعني ايه؟؟
يعني السن ده اللي بنتعود فيه على الحاجات عشان تفضل معانا لما نكبر
بمعنى اصح سننا ده اللي بنعمله فيه مش هنعرف نبطله لما نكبر
معنى كدة اننا لو متعودناش على حاجة من صغرنا حياتنا هتبقى فاضية لما نكبر
طيب بقى نسيب اللي مبيعملوش حاجة في حياتهم يفكروا مع نفسهم شوية
و نيجي بقى للاوحش
اللي بتتعود على المعصية و تقول لما اكبر ابقى ابطل

مانا لسة قيلاك يا زوزتي من شب على شئ شاب عليه
ايا كان الشئ ده وحش او حلو
يعني اللي تتعود على الكذب من صغرها دي بتبطله
و لا اللي تلبس قصير و ضيق من و هى في السن ده و تقولك لما اكبر ابقى اتعدل عمرها ما هتتعدل للاسف
سننا ده لاااااازم و لا بد التعود فيه على حاجات كتيييير
زي الحفاظ على صحتنا مثال صغير : غسل الاسنان
زي العبادات مثال صغير : الحفاظ على الصلاة
و زي القيم و الاخلاق مثال صغير : الامانة
ده سن تعود مش سن تطنيش و لا سن لا لا لا لما اكبر ابقى اعمل كدة دلوقتي المفروض اعيش حياتي

انا مبقولكيش متعيشيش يا قمرة
هو انتي يعني لو حافظتي على عبادات و على صحتك و اتعلمتيلك كدة شوية اخلاق تتحلي بيها
يبقى كدة انتي مش عايشة
يا سلاااام دي تبقى احسن عيشة
يعني انتي مش نفسك تبقى احسن و احلى واحدة؟؟
مش نفسك تحققي حلمك؟؟
مش نفسك الكل يضرب بيكي المثل للفتاة المهذبة اللي عارفة دينها كويس؟؟
مش عايزة ترفعي دينك الاسلام؟؟
كل الحاجات دي لما تكبري لما تكبري
انتي لما تكبري هتعملي ايه و لا ايه و لا ايه
و بعدين دي احلى حاجة لما الناس تقول عليكي سابقة سنك
لما تثبتي للناس كلها ان السن بالعقل مش بالجسم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى