ليت لأهل الحب قاضي وتشريع …
سر ياقلم وأكتب بخط الأصابـــــــيع
أبيات زيّن هاجسي مبتداهــــــــــــا
الحب والله مزّع القلب تمزيــــــــع
بين الضلوع اللي تزايد بلاهـــــــــا
له في معاليقه أطعون ومواجيـــــع
كم كيةٍ بأقصى خفوقي كواهــــــــــا
ياليت لأهل الحب قاضي وتشريـــــع
يسجن قلوبٍ ماتقّدر غلاهـــــــــــــا
وماتطلع ألا بعد بصمة وتوقيـــــــع
تبقى وفيّه مخلصة في هواهــــــــا
الفكر شد وما لقاله مرابيـــــــــــع
وكم ديرةٍ بالسيل ربي سقاهــــــــا
مكتوب له همٍ وغربة وتلويـــــــع
وجروح ماتبرى وصعبٍ دواهـــــا
الورد لو يسقيك عذب الينابيـــــــع
له شوكةٍ بقصى الظماير حناهـــــا
بنتٍ لها في داخل القلب تطويــــــع
حلوه محاسنها وحلوٍ نباهـــــــــــا