قواعد من منة لكى تصبحى الاولى 2019

دى حاجات كنت بعملها وضرتنى وحاجات عملتها ونفعتنى جــداً

☜يا بنــات مش لازم النت خالص ايام الدراسة يعنى انسى عدلات والفيس وغيــره
اكيد انتم مجربين ان الوقت بيضيع بطريقة رهيبة وال5 دقايق بيبقوا ساعة ونص.
~ ~ ~
☜ تانى حاجة انتِ مش لازم تقارنى وبينك وبين أى حد كل واحد وليه قدراته،
شوفى انت اقصى مجهود ممكن تبذليه وتكونى راضية عن نتايجه.
~ ~ ~
☜ عودى نفسك انك لازم ولابد تحضّرى دروسك وتستخلصى الافكار وتدورى على المعانى الصعبة
وحاولى تفهميها لوحدك ده هيخليكى تستوعبى اكتر لما المدرس يشرح
وهينفعك فى ثانوى والجامعة بإذن الله .
~ ~ ~
☜ مش لازم تاخدى دروس لمجرد ان زملائك بياخدوا ،شوفى إيه المادة اللى ممكن تفهميها من المدرسة
ومش محتاجة فيها دروس واستفادى بالوقت ده وذاكرى اللى انت مقصرة فيه .
~ ~ ~
☜ فيه مدرسين بيقولوا ان الارقام فى الجغرافيا فى اعدادى او ثانوى مش مهمة ،
لأ مهمة وبتيجى ساعات فإنتِ مش هتخسرى حاجة لو بصيتى عليها .
~ ~ ~
☜ فيه بنات مبتذاكرش مواد لمجرد انها مش بتحبها او لانها تلمة او عشان الكتاب ممل
ممكن تيجيبى مذكرة من عند مدرس شاطر وتعصرى على نفسك لمونة وذاكريها .
~ ~ ~
☜ خليك دايما فاكرة انك لازم تفرحى مامتك وباباك بيك وتخليهم فخورين .
~ ~ ~
☜ ابعدى عن الغش والغشاشين مفيش حاجة اسمها مراجعة فى لجنة الامتحان ،
او مساعدة صديق والغش زيه زى الكذب والنفاق وابغض كمان .
~ ~ ~
☜ اشتغلى علطول مع المدرس وجاوبى حتى لو مش متأكده مفيهاش حاجة
انا كنت كده وكنت بتحرج او بخاف الحقيقة مش عارفة .
~ ~ ~
☜ ذاكرى أول بأول وعلطول متجيش قبل الامتحانات بأسبوع وتذاكرى بجد
انت آه ممكن تخلصى وتذاكرى كويس جدا
بس ربنا مش هيديك زى االلى ذاكرت طول الترم.
~ ~ ~
☜ واخيرا يا بنات عشان تنظمى وقتك اقيمى الصلاة فى اوقاتها
يعنى اول ماتسمعى الآذان قومى اتوضى وممكن الوقت مابين الاذان والإقامة
تقرأى قرآن وتدعى وبجد وقتك هيتنظم وتعلمى كل اللى وراك .

~ ~ ~
ولسه فيه فرصة اللى نقص جامد يعوض ان شاء الله
واللى متفوقش يتفوق حطوا بس الهدف قدام عنيكوا دايما .