حول الحجاب واستعراض الحجاب 2019

بسم الله الرحمن الرحيم
السلام عليكم ورحمة الله وبركاته
كيف احلى اعضاء لاحلى منتدى ان شاءالله تكونو بخير
حابة احكي بموضوع كتييير مهم وياريت الكل يتفاعلو معي

* دايما بشوف قدامي وبكل مكان بنات وبالزات بالسوق وبالاماكن العامة…وهن بمكياج كامل.. وكأنو الوحدة رايحة لعرس او شي مناسبة خاصة وكأنو عم يستعرضو بحالهن متل البضاعة الرخيصة يلي بعرضوها عالماره..
وبعبايات اشكال والوان..وتحولت هالعبايات من شي بستر لشي بدو ستر…
تحولت العبايات لفساتين سهرة وبكل الاشكال والالوان..وبكل القياسات..
وتحولت المجمعات لدور عرض ازياء..والدخول بالمجان…
بحب قول لكل وحده بتعمل هيك…

ربنا عطاكي نعمة الصحة والبصر والجمال …
حرام تستخدمي شي عطاكي اياه ربنا غلط…
يمكن ينزع منك نعمة البصر والصحة ..يمكن يحترق وجهك يلي بتجمليه بالزينه لحتا يطلعو عليكي العالم…يمكن يشل بدنك هاد يلي بتزينيه للناس…
تأكدي…
انو اي حدا بشوفك وبنفتن فيكي رح يُسجل عليكي معصيه..وازا ارتكب معصيه بسببك (كالزنا) مثلا والعياذ بالله..رح تُسجل بصحيفتك..تخيلي تروحي عالسوق او حيالله محل لحتا اتجمعي مليون سيئة وترجعي عالبيت وانتي مغضوب عليكي..
كم واحد فتنتيه؟؟ كم واحد ارتكب غلط بسببك؟؟؟كم وحدة اتاثرت بلبسك وبعبايتك؟؟كم واحد انفتن بحركاتك ؟؟كم وكم ؟؟
بالاخير كل هادول يلي اتأثرو فيكي رح تاخدي سيئاتهن ويلي بتأثر بهادول بسببك كمان رح تاخدي سيئاتهن..

سؤالي:ليش عم ترخّصي حالك كل هالقد وانتي غاليه عند ربنا؟؟؟
ليش تحطي حالك محل اتهام بأخلاقك وبسمعتك؟؟
ياترى ايمتا بدك توبي؟؟ تأكدي انو الموت مارح يستأزن حدا..
* كتير بسمع عن بنات بعرضو حالهن عالنت وهن برقصو وهن مغطين وجهن (خايفين من الفضيحة يعني)..ومش خايفين من ربنا..
وكتير بسمع عن بنات بحكو مع شباب عالمسنجر وبشغلو الكام وبساووو شغلات عاطله الخ
وكتير بسمع عن بنات ببعتو صورهن للشباب وهن بلا تياب عالموبايل او النت ..الخ
وكتير بنات عملو من حالهن مسخرة لحتا يضحكو عليهن الشباب يلي مابخافو من الله..
السؤال بقول: ليش تحول استخدام التكنولوجيا لاستخدامات محرمة؟؟
ليش صارو كتير بنات وكتير شباب بمارسو (الزنا) التكنلوجي اللفظي والبصري والسمعي؟؟؟
ليش صار اهتمامات كتير شباب وبنات اهتمامات محرمه؟؟
ياترى وين الخوف من المرض والموت؟؟
ياترى وين الخوف من الفضيحة؟؟
ياترى وين الخوف من الله؟؟
لانو عن جد ..عن جد عيييب يلي قاعد بصير..
قرفنا..وزهقنا من كتر ماعم نسمع مصايب وقرف..
كل الخوف انو ينزل علينا عقاب يعّم الصالح والطالح فينا..
تأكدي:
انا مش ضد انو البنت تروح عالسوق ..انا ضد تروح عالسوق لتفتن العالم؟؟
انا مش ضد استخدام النت والموبايل..انا ضد استخداماتو الغلط؟؟
بالاخير :
قال صلى الله عليه وسلم:
(من سنّ في الاسلام سُنه سيئه فله وزرها ووزر من عمل بها الى يوم القيامه )

كل الود والحب:
اختكم: نايلية وفخر ليا

الوسوم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق