حبي الأول؟؟؟
حبي الأول
نعم ياحبي الأول..نعم ياحبي التالي
نعم ياكلمة كانت ولازالت تبكيني
نعم ياأمسي الماضي نعم يايومي الحالي
نعم كنتي ولازلت حياتي مني وفني
نعم جيت اعترف لك في كلام شاغلن بالي
لأول مره أتكلم عن اللي منك كاويني
أنا وأنت نشوف الياس فرقنا ولا نبالي
ألومك لاتغيرتي ولا صديت لمتيني
عرفتك يوم كنا صغاروبدا وياك غربالي
ذبحتك في كثر صبري وفي صبرك ذبحتيني
ولانتي ساليه عني ولاني عنك بسالي
وقلبك هم مثل قلبي هجرتك مانسيتيني
عنيده انتي وانا معتز في رايي ولا ابالي
وكان الوقت بالفرقا يجازيك ويجازيني
وعيا الوقت يجمعنا تعذبنا على الخالي
مع أن المسأله هاللحين في يدينك وبيديني
أنا أشوف الأمل عندي ولكن ماتهيالي
أمل عندي أمل لكن سراب كيف يرويني
بغيت أنساك وأتحداك وأعيش بعمري لحالي
أقول اللي مضى يكفي ابلحق باقي سنيني
رحلت أدور النسيان مثل غالي يبي غالي
بغيت أكذب على نفسي وأقول انك كرهتيني
عرفت من البشر ميات شفت ألوان وأشكالي
خدعني بعضهم والبعض الآخر كان يغليني
وخدعت البعض منهم في كلام ناعم حالي
وعشت الوقت عرض بطول شفت الزين والشيني
أروح بعيد وأرجع لك خيالك كل ما اومالي
أجيك أركض واخلي الناس مااسمع من يناديني
والى مني رجعت ألقاك مع ان أبعادك اشوالي
والى منك رجعتي لي على عهدي لقيتيني
لقيت اسمك على صوتي لقيتك دايم قبالي
أشوفك حلم واحلم بك حقيقه يانظر عيني
أنا وحدي مشيت الدرب بديت أحقق أمالي
ولقيت أغلى أمل انت من الدنيا يكفيني
أحسك كل ماغمر في حناني غالي عيالي
إلى ضميت أنا أصغرهم أشوفك بينه وبيني