تختاري تعيشي مع مين في دول ؟؟؟ 2019

في هذا القسم دايما كل مواضيعنا بتهتم بطرق المعاملات الزوجية داخل البيت بين الزوج والزوجة وبيدي نصايح علشان حياتنا تكون احسن ونبني اسرة مترابطة ومتفاهمة
طيب انا عاوزة اخد رأيكم فحاجة مهمة هما اختيارين ملهمش ثالث ومطلوب من كل واحدة تدخل وتقراهم تكتب هتختار ايه وممنوع اختيار حاجة غير الاتنين دول
لو ادامك مشكلتين لاتنين ستات وكل واحدة متزوجة وعايشة حياتها بما يرضي الله ولكن كل واحدة ربنا رزقها بزوج ليه صفات وظروف عكس التانية خالص
الزوجة الاولى : زوجها متزوج عليها واحدة تانية وطبيعته صعبة جدا وعندي والحياة معاه كزوج لا تطاق وبتحمد ربنا انه اتجوز واحدة عليها علشان تشيل عنها قرفه وكل اللي مصبرها عليه الاولاد وكمان ان مفيش حاجة بتطلبها الا وبيجيبها مهما ان كانت لانه مقتدر ومش مخليها هي والاولاد محتاجين اي شيء والمدارس على اعلى مستوي والمصاريف بتكفيهم كويس اوي بس مشكلته الوحيدة اللي مأزمة نفسيتها انه اتجوز عليها وكل شوية تفتكر صبرها عليه ومعاناتها معاه وعدم تقديره لها
الزوجة الثانية : هي الزوجة الاولى والوحيدة مش متزوج عليها ولكن بخييييييييل معها لدرجة كبيرة جدا ممكن يجيب اي شيء للاولاد ولكنه بيستخسر فيها اقل حاجة مهما ان كانت رخيصة وملهاش اي مصدر رزق غيره وعمره ما يغفر لها اي خطأ ولا بيسامحها ودايما بيعلق على تصرفاتها تعليق سيء وغير متواجد معها ولا يشاركها بأي مشكلة ولو حتى فشراء ملابس للاولاد كل حاجة هو بيجيبها من غير ماياخد رأيها يعني لو العيد ومحتاجين ملابس للاولاد علشان العيد ياخد الاولاد لوحدهم ويختار اللبس ويشتريه وهي ملهاش اي لزمة ولا حتى بيفكر يشتريلها حاجة تفرحها عكس الزوجة في الاختيار الاول
الزوجتين اللي بقولكم على حياتهم انا عارفاهم كويس وبقارن حياتهم وكل شوية اسأل نفسي لو هختار حياة واحدة منهم اعيشها اختار مين
اللي متجوز زوجة تانية ولا البخيل
انا بفضل اللي متجوز زوجة تانية عالاقل مش هيقصر معايا فحاجة نفسي فيها وينسيني بيها الحياة المزدوجة
انا حاسة موضوعي دة زي موضوع الاعادة فالانتخابات اتنين مرشحين للرئاسة والكل خايف منهم ومطلوب مننا نختار واحد بس
كل عدولة تدخل تقولي تختار تعيش حياة مين فالزوجتين لو اتحطت فموقفهم
وشكرا لاني تعبتكم معايا وخلونا نعتبر دا استفتاء
ايه رأيكم