بنت…وبتشتمى ياخساره!!بتشتمى يانهار مش فايت:( 2019

بنت…وبتشتمى ياخساره!!بتشتمى يانهار فايت:( 3dlat.net_30_16_6ab3

بعد ثورة يناير انتشرت المقولة الشهيرة “الثورة طلعت أوحش ما فينا”، وبما أنها طلعت أسوأ ما فينا، كان من الطبيعى إنك تلاقى الشباب فى كل حتة بيشتم من غير ما يراعى وجود البنات، أو الناس الكبار، أو حتى العيال الصغيرة اللى ممكن تردد الشتايم وراه لمجرد التقليد.. الجديد بقى اللى اكتشفناه اليومين دول، هو إن البنات بقت هى اللى بقت بتشتم بحجة التحرر والحرية الشخصية، علشان كده سألنا البنات عن رأيهم فى ظاهرة الشتايم عمال على بطال، وبدأنا مع ديمة نصار اللى قالت: زى ما إنتِ حرة تشتمى براحتك، أنا كمان حرة إنى أكون مش عايزة أسمع الكلام ده، آه كلنا بنشتم بس على الأقل بنعمل ده قدام بنات زينا، وبنحترم إن لكل مقام مقال، وإننا لازم نحافظ على إن صورتنا تفضل كويسة قدام الناس.
أما إيمى الصاوى فأضافت: فى بنات بتشتم عشان البيئة اللى جاية منها الشتيمة فيها عادية، وفى بنات تانية بتشتم عشان تحسسك أنها جاية من البيئة دى، بس مش لأى سبب تانى، حاجة مش منطقية طبعا.
كملت منال إبراهيم وقالت: فى المقام الأول لازم نحترم نفسنا ونحترم الناس اللى قدامنا كمان، وبعدين الشتيمة عمرها ما كانت دليل تحضر وتمدن وحرية، أمال الانحطاط يبقى إيه؟!
وإلى ندا محمود وبسمة حسين، واللى كان رأيهم إن هوس المساواة بين البنت والولد، هو اللى بيخلى بنات كتير ترفض تلتزم بأى حاجة محظورة عليها كبنت، وتشتم عادى وتشرب سجاير وتخرج وتهزر.
من البنات للشباب انتقلنا، وسألنا شادى مجدى وباسم صوان عن رأيهم فى البنت اللى بتشتم فردوا: مش منطقى خالص إنى أسيب العيال الصغيرة اللى بتقول كلام ميتقالش وأمسك فى البنت اللى بتشتم، هى حرة سواء هتشوف ده احترام أو قلة أدب أو حرية، ده يرجعلها هى فى الآخر.
خالفهم فى الرأى أبانوب إدوارد اللى قال لكل بنت بتشتم: اشتمى براحتك وأنا هسقطك من نظرى براحتى، بس عمرى ما هبينلك إنى اتضايقت أو غيرت نظرتى عنك، بتعملى كده عشان تثبتى إنك ثورية حرة، حلو أوى أنا هحسسك إنى شايفك كده بجد.
وبالنسبة لأحمد منصور فقال لنا: الثورة ماخرجتش أسوأ ما فينا ولا حاجة، بس القيود اللى كنا حاطينها حوالين نفسنا دى اتفكت خلاص والعيب واللى مايصحش حاجة نسبية، كل واحد بيشوفها من وجهة نظره وبس.

طب وانتى رأيك ايه؟

الوسوم
عزيزي الزائر اذا كان لديك اي سؤال او اي استفسار يمكنك مراسلتنا عبر رقم الواتساب 0993817568

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق