الخطوات الذكية.. للحفاظ على علاقة عاطفية متينة وقوية 2019

اى علاقة عاطفية بين رجل وامرأة سواء كانت خطوبة أو زواج، بييجي عليها وقت وتمر بمرحلة من القلق والتوتر والمشاحنات؛ بسبب ضغوط الحياة والمسئوليات، وده طبيعي في أي علاقة، لكن الذكاء بقى إننا نحاول إن الفترة دي تعدّي بسلام.

وفي موضوعنا النهارده هنحاول نلخّص في بعض الخطوات البسيطة إزاي نحافظ على علاقة قوية بشريك حياتنا، ونوصل بها لبر الأمان.

لا تلوميه ولا تنتقديه
علشان تعرفي تحافظي على شريك حياتك، وتتمتّعي معاه بعلاقة قوية وسعيدة، لازم تعرفي إن فيه كلمات ما ينفعش إنك تقوليها له، زي: “عمرك ما عملت لي حاجة حلوة في حياتك”، “كل حاجة حلوة بينا بتضيّعها”… وغيرها من الكلمات اللي بتكوني عايزة تعبّري بها عن نقدك ولومك له، لكنها بتترك أثر سلبي جدا عنده، وممكن تلاقي نتيجة عكسية منه.

يعني حاولي تتجنّبي الكلمات دي على أد ما تقدري، وبدل ما تشتكي منه أو تلوميه إنه ما عملش حاجة إنتي كنتي محتاجة لها، اطلبي منه كل اللي إنتي عايزاه بشكل واضح ومباشر ومحدد وكمان بطريقة إيجابية، وحاولي إنك تظهري له تقديرك للحاجات الحلوة اللي بيعملها؛ يعني لو عايزة تخرجي معاه ممكن تقولي له: “أنا عارفة إنك بتتعب أوي في الشغل، لكن لو خرجنا يوم مع بعض أكيد ده هيفرق معانا إحنا الاتنين”.

وخدي بالك إن الرجل بيحتاج دايما من شريكته إنها توجهه وتقول له على التصرفات اللي هي بتحبها منه، واللي لازم يعملها علشان تكون مبسوطة، وما تستنيش منه إنه يبقى عارف دايما إنتي بتفكري في إيه علشان يعرف إنتي عايزة منه إيه؛ لأن شريكك لما يعرف إيه الحاجة اللي بتسعدك فعلا هيواظب عليها.

اذكري له إيجابياته
من الأخطاء اللي بتقع فيها ستات كتير ودايما تسبب مشكلات بينها وبين شريكها هي التركيز على السلبيات والأخطاء اللي بيعملها.

الست الذكية هي اللي تدوّر على أسباب السعادة مع شريكها مش العكس، وبلاش تركيزك يبقى على السلبيات بس؛ يعني اهتمي دايما بنصف الكوب المليان، وركّزي على الإيجابيات والحاجات الحلوة اللي بيعملها.

ودايما شجّعيه بكلام حلو على كل حاجة كويسة بيعملها حتى لو كانت بسيطة؛ لأن ده هيدّي له دافع إنه يزوّد الحاجات دي بعد كده؛ لأن الرجل لما بيشوف إن شريكته بتلاحظ الحاجات الحلوة اللي بيعملها حتى لو كانت قليلة هيحاول إنه يزوّدها علشان يحس بإعجابها ومدحها أكتر.

لازم تسمعي له كويس علشان تملكي قلبه

اسمعيه كويس
علشان تملكي قلب شريك حياتك -سواء كان جوزك أو لسه خطيبك- لازم تسمعي له كويس.. خليكي دايما منتبهة لكلامه وحسّسيه إنك بتسمعيه بكل الاهتمام والحب مَهما كانت مسئولياتك ومشاغلك؛ فمش لازم إنها تبعدك عنه.

وما تكتفيش بإنك تنصتي له وبس، لكن لازم تشاركي معاه بآرائك وتعليقاتك الإيجابية طبعا.

صالحيه لما يزعل
إذا كنتي بتواجهي مشكلة في علاقتك مع شريكك، وحاسة إن ممكن المشكلة دي تتطور للانفصال -لا قدّر الله- الحقي نفسك، وحاولي تصلّحي ما يمكن إصلاحه، لو كنتي حريصة إن العلاقة دي تستمر، وكل اللي عليكي إنك تصالحيه بالترتيب اللي هنقول عليه دلوقتي:

– اعتذري له
بلاش تترددي أبدا في الاعتذار عن غلطة عملتيها من غير جدال ومناقشة كتير لو كنتي مقتنعة إنك فعلا غلطانة؛ لأن الاعتراف بالغلط والاعتذار عنه أول طريقك علشان تذوّبي الجليد في العلاقة.

– اظهري له حُبك
اللي المفروض تعمليه بعد كده علشان تصلّحي اللي ما بينكم هو إنك تظهري حبك لشريكك في وقت الاختلاف؛ يعني لو كان زوجك غضبان منك إيه المشكلة لو تعبّري له عن حبك بحضن دافئ يبيّن له إنك عايزة تصالحيه وتبطّلوا خصام، وممكن تشتري له هدية بسيطة تعبّري بيها عن رغبتك في إصلاح اللي بوّظتيه.

– اوعديه بالتغيير
أما ثالث وأهم خطوة هي الوعد بالتغيير، والأهم إنك ما تعتمديش على الكلام وبس، لكن لازم تدمجي كلامك بالأفعال والمبادرة في التنفيذ؛ يعني لو كان سبب الخلاف بينك وبين جوزك هو إهمالك للبيت أو للأولاد، فلازم يرجع من الشغل ويلاقي إن الوضع اختلف والحال اتصلّح.

لازم من وقت للتاني تخرجوا مع بعض

اخرجوا سوا
من أكثر الطرق المجرّبة علشان تزيل الضغط وتصفّي الجو بين الشريكين؛ هي إنكم تلاقوا وقت علشان تخرجوا فيه مع بعض، فلو كنتي متجوزة يبقى لازم من وقت للتاني تاخدي أجازة إنتي وجوزك، تقضّوها مع بعض في أي مكان بعيد عن أي ضغط.

الكمال لله وحده
من الطرق السحرية للحفاظ على علاقة زوجية سعيدة وهادئة، هو إنك دايما تفهّميه إن الكمال لله وحده، مع الاجتهاد في الوصول لعلاقة مثالية، لكن لو ماوصلتوش للمثالية بنسبة 100%، فده شيء متوقّع، المهم إنكم تقدروا تتخطّوا سوا المشكلات اللي دايما بتقابلكم، لكن من غير ما أي طرف يحسس التاني بعجزه أو بفشله في حاجة معينة.

في آخر الموضوع عايزين نقول إن بالحب والتفاهم والنقاش البنّاء والإيجابي، ممكن توصلي مع شريك حياتك لأقصى درجات السعادة والتناغم، لكن ده طبعا هيحتاج لمجهود منك ومنه.